უკრაინის ეროვნული უსაფრთხოებისა და თავდაცვის საბჭო მიიჩნევს, რომ ქვეყანაში საგანგებო მდგომარეობა უნდა გამოცხადდეს. გადაწყვეტილება მათ დღევანდელ სხდომაზე მიიღეს და სამშაბათს უმაღლეს რადას მიმართავენ, რომელმაც უნდა დაამტკიცოს.

საბჭოს მდივნის, ალექსეი დანილოვის განმარტებით, საგანგებო რეჟიმი უკრაინის მთელ ტერიტორიაზე იმოქმედებს, გარდა ლუგანსკისა და დონეცკისა, სადაც ამის წესის გავრცელება შეუძლებელია, მაგრამ იქ უკვე მოქმედებს საგანგებო სამართლებრივი რეჟიმი, რადგან მიმდინარეობს საომარი მოქმედებები. დანილოვის თქმით, საგანგებო რეჟიმი რეგიონების მიხედვით განსხვავებული იქნება.

რუსეთის პრეზიდენტმა, ვლადიმერ პუტინმა უკრაინის ოკუპირებული ტერიტორიები თვითგამოცხადებული ლუგანსკი და დონეცკი "დამოუკიდებელ რესპუბლიკებად" აღიარა. პუტინმა ეს გადწყვეტილება უკრაინის "აგრესიით" ახსნა და გასამართლებლად არაერთი პროპაგანდისტული მესიჯი გააჯღერა. მან უკრაინის ხელისუფლებას მოუწოდა, "დროულად შეწყვიტონ სამხედრო ქმედებები", წინააღმდეგ შემთხვევაში კი "ნებისმიერ სისხლისღვრაზე" პასუხისმგებლობა მათ დააკისრა.

პუტინის გადწყვეტილება მინსკის შეთანხმების უხეში დარღვევაა, რასაც უკვე გამოეხმაურენ მსოფლიო ლიდერები. ეს ქმედება დაგმო საქართველომაც.

აღიარების შემდეგ პუტინმა უკრაინის ტერიტორიაზე ჯარები გაგზავნა, მოტივად კი ისევ "სამშვიდობო მისია" დაასახელა. პუტინი ბრძანებაში ამტკიცებს, თითქოს უკრაინის ორი რეგიონის "დამოუკიდებლობა" კონფლიქტის მშვიდობიანი რეგულირებისა და მინსკის შეთანხმების გათვალისწინებით აღიარა.

დოკუმენტში ასევე ვკითხულობთ, რომ რუსეთს საგარეო საქმეთა სამინისტორს დაევალა, დონეცკისა და ლუგანსკის "მთავრობებთან" მოამზადოს მეგობრობის და ორმხრივი ურთიერთობების შეთანხმება. პუტინის ბრძანების მიხედვით, დონეცკისა და ლუგანსკის "მმართველების" მიმართვის საფუძველზე, შეთანხმების დადებამდე "სამშვიდობო მისიით" გაგაზავნიან ჯარებს.