ბიძინა ივანიშვილი ღია წერილს აქვეყნებს, რომელშიც განმარტავს, რომ მან დაპირებების დიდი ნაწილი შეასრულა. იმ დაპირებათა ჩამონათვალში, რომელთა სიასაც ივანიშვილი ასაჯაროებს, დამოუკიდებელი სასამართლო სისტემისა და ერთი ჯგუფის მიერ მონოპოლიზებული ბიზნესის ნაცვლად, თავისუფალ ბიზნესსაქმიანობის შექმნაც შედის.

ყოფილი პრემიერი განმარტავს, რომ 2011 წელს თავის თანამოქალაქეებს რიგი პირობის შესრულებას დაპირდა. კერძოდ:

  • მის მიერ შექმნილი ახალი პოლიტიკური პარტიისა და ჯანსაღი პოლიტიკური ძალების გაერთიანებით 2012 წლის საპარლამენტო არჩევნებს აბსოლუტური უმრავლესობით მოგება.
  • მის მიერ პრემიერის ან პარლამენტის თავმჯდომარის რანგში ახალი მთავრობის ჩამოყალიბებაში მონაწილეობის მიღება და ელიტურ კორუფციის აღმოფხვრა.
  • აფხაზეთისა და სამხრეთ ოსეთის ტერიტორიებზე ქართული სახელმწიფოს იურისდიქციის აღდგენის პერსპექტიულობის შექმნა.
  • დამოუკიდებელი სასამართლო სისტემის შექმნა და ამას პროცესის შეუქცევადად ქცევა.
  • საინტერესო საინვესტიციო გარემოს და ერთი ჯგუფის მიერ მონოპოლიზებული ბიზნესის ნაცვლად, თავისუფალი ბიზნესსაქმიანობისთვის საფუძვლის ჩაყრა.
  • სოფლის მეურნეობის აღორძინების პროექტის ბოლომდე მიყვანა.
  • ტექნოლოგიური უნივერსიტეტის დაარსებისა და მაღალტექნოლოგიური სამუშაო ადგილების შექმნის პროექტისათვის საბოლოო სახის მიცემა.
  • რუსეთთან ურთიერთობის დალაგების დაწყება.
  • აშშ-სა და ევროკავშირთან მეგობრობისა და ინტეგრაციის გაღრმავება.

ივანიშვილი განმარტავს, რომ ზემოჩამოთვლილი საკითხების გადაჭრას დაახლოებით ორი-სამი წელი დასჭირდებოდა, რის შემდეგაც ის აპირებდა პოლიტიკიდან წასვლას იმისთვის, რომ ქვეყნის საზოგადოებრივ ცხოვრებაში აქტიური მონაწილეობა მიეღო:

"ეს იყო ძირითადი ნაწილი ჩემი დაპირებებისა, რომლებითაც მოვედი პოლიტიკაში და სწორედ მათი შესრულებით უნდა დაწყებულიყო იმ ნიადაგის მომზადება, რომელსაც დაეფუძნებოდა ქვეყნის შემდგომი განვითარება".

ყოფილი პრემიერი ასევე ამბობს, რომ მისთვის მნიშვნელოვანი იყო და არის, საზოგადოებაში არსებული დაძაბულობის განელება და სახელმწიფოს წინაშე მდგარ სტრატეგიულ საკითხებთან დაკავშირებით ეროვნული თანხმობის მიღწევა:

"მიუხედავად იმისა, რომ ხშირად ეს მოსაზრება კრიტიკის ქარ-ცეცხლს იწვევდა და იწვევს, მე ამ გზიდან არასოდეს გადამიხვევია და არც გადავუხვევ, ვინაიდან, სწორედ ეროვნული თანხმობა არის გზა ღირსეული მომავლისკენ. პირველივე დღეს განვაცხადე და სულ ვიმეორებ, რომ საქართველოს დასაკარგი და მოსაკვეთი არავინ ჰყავს, მთავარია, ადამიანი დროზე მიხვდეს ჩადენილ შეცდომებს, მოინანიოს და სიკეთისკენ გადადგას ნაბიჯი".

ბიძინა ივანიშვილმა ღია წერილი დღეს, 30 მაისს, გამოაქვეყნა.