პუტინის მიმართვისას, როდესაც მან რუსეთის მხრიდან დონეცკისა და ლუგანსკის "დამოუკიდებელ რესპუბლიკებად" აღიარების შესახებ განაცხადა, რუბლი დოლართან და ევროსთან მიმართებით გაუფასურდა.

უფრო კონკრეტულად, დოლარის ღირებულება 80 რუბლს, ხოლო ევროს — 90 რუბლს გადასცდა. ამჟამად ერთი დოლარი 79,7573 რუბლად, ხოლო ერთი ევრო 90,2287 რუბლად ივაჭრება, რაც რუსული ვალუტისთვის მნიშვნელოვანი გაუფასურებაა.

რუსეთის ცენტრალური ბანკის ინფორმაციით, 22 თებერვლის ოფიციალური გაცვლითი კურსი ასეთია:

  • 1 დოლარი — 76,7671 რუბლი;
  • 1 ევრო — 87,3379 რუბლი.

ჯერ კიდევ პუტინის მიმართვამდე რუსული კომპანიების აქციები ბოლო რვა წლის განმავლობაში ყველაზე მეტად შემცირდა. ბლუმბერგის ინფორმაციით, მოსკოვის საფონდო ბირჟის ინდექსი (MOEX Russia Index) 11%-ით დაეცა, რაც 2014 წლის შემდეგ ყველაზე დიდი ვარდნაა. დღის განმავლობაში ინდექსის 14%-იანი ვარდნაც დაფიქსირდა, რაც 2008 წლის ნოემბრის შემდეგ ყველაზე ცუდი შედეგია.

ანალიტიკოსების შეფასებით, კონფლიქტის გაღრმავების შემთევევაში რუსული აქტივები კიდევ უფრო მეტად დაეცემა.

რუსული რუბლისა და კომპანიების აქციების ვარდნა რუსეთსა და უკრაინას შორის არსებულ დაძაბულობას უკავშირდება. გუშინ, 21 თებერვალს პუტინმა უსაფრთხოების საბჭოს სხდომა მოიწვია, რის შემდეგაც დონეცკი და ლუგანსკი "დამოუკიდებელ რესპუბლიკებად" აღიარა. რუსეთის პრეზიდენტმა ეს გადაწყვეტილება უკრაინის "აგრესიით" ახსნა და გასამართლებლად არაერთი პროპაგანდისტული მესიჯი გააჯღერა.

მან უკრაინის ხელისუფლებას მოუწოდა, "დროულად შეწყვიტონ სამხედრო ქმედებები", წინააღმდეგ შემთხვევაში კი "ნებისმიერ სისხლისღვრაზე" პასუხისმგებლობა მათ დააკისრა.