უკრაინის თავდაცვის მინისტრის, ოლეკსი რეზნიკოვის განცხადებით, კრემლი ცდილობს, რომ უკრაინაში საქართველოში განვითარებული სცენარით იმოქმედოს. მისი თქმით, რუსეთი ამზადებს საბაბს, რათა უკრაინის ოკუპირებული ტერიტორიების დამოუკიდებლობა აღიაროს.

"პროვოკაცია არ შეწყდება. კრემლი მაინც ამზადებს საფუძველს, რათა უკრაინის დროებით ოკუპირებული ტერიტორიების აღიარება მოახდინოს, იმ სცენარით, რომელიც საქართველოში გამოსცადა. [ამზადებს] მიუხედავად იმისა, განხორციელდება ეს თუ არა, მხოლოდ იმიტომ, რომ ეს ვარიანტი მაგიდაზე ედოს", — აღნიშნა მან.

მისივე თქმით, გასულ ღამეს საოკუპაციო ხელისუფლებამ გაავრცელა დეზინფორმაცია, რომ უკრაინა უკვე ემზადებოდა შეტევისთვის. ამას რეზნიკოვი უარყოფს და აღნიშნავს, რომ კიევი ძალისმიერი ქმედებების გამოყენებას არ აპირებს.

"ჩვენ ვიმოქმედებთ პოლიტიკური და დიპლომატიური გზით და ჩვენს მოქალაქეებს საფრთხეში არ ჩავაგდებთ. მივმართავ ლუგანსკის, ალჩევსკის, დონეცკის, გორლოვკას, იასინოვატაიას და სხვა ქალაქების მოსახლეობას: ხალხო, არ შეგეშინდეთ, თქვენი მტერი უკრაინა არ არის, არამედ ის, ვინც თქვენი კედლების მიღმა იმალება. უკრაინის თავდასხმის შესახებ ჭორები არ დაიჯეროთ", — თქვა მან.

ამასთან, უკრაინა რუსეთის მიერ საზღვრებიდან ჯარების გაყვანას უარყოფს და აცხადებს, რომ ჯამში კრემლს 149 000 სამხედრო ჰყავს მობილიზებული. რეზნიკოვის თქმით, მათი რიცხვი უახლოეს მომავალში, შეიძლება, კიდევ უფრო გაიზარდოს.

17 თებერვალს ოკუპანტებმა დონბასიდან ლუგანსკის ოლქის ერთ-ერთ დასახლებას ცეცხლი გაუხსნეს, ჭურვი კი საბავშვო ბაღს მოხვდა. ამას უკრაინის პრეზიდენტმა, ვოლოდიმირ ზელენსკიმ "დიდი პროვოკაცია" უწოდა და ხაზი გაუსვა უკრაინაში დიპლომატების დარჩენის აუცილებლობას. რეზნიკოვმა კი აღნიშნა, რომ რუსეთი ავრცელებს ყალბ ცნობებს, თითქოს ბომბი უკრაინულმა მხარემ გამოიყენა.

რუსეთის მტკიცების პარალელურად, რომ უკრაინის საზღვრის სიახლოვიდან რუსული ჯარები გაჰყავთ, აშშ-ის პრეზიდენტის ადმინისტრაციის ოფიციალური წარმომადგენელი ამბობს, რომ ბოლო დღეებში უკრაინის საზღვართან რუსი სამხედროების რიცხვი 7 000-ით გაიზარდა. ზელენსკიც უარყოფს, რომ რუსეთის ჯარები გადიან. მისი თქმით, ამას რეალურად ვერ ხედავენ და მხოლოდ ესმით მის შესახებ.

ამერიკის შეერთებული შტატების სახელმწიფო მდივნის, ენტონი ბლინკენის განცხადებით, რუსულ სამხედრო ძალებს უკრაინის საზღვარი არ დაუტოვებიათ. მისი თქმით, რუსეთის ქმედებები და განცხადებები ერთმანეთისგან განსხვავდება.

პენტაგონის ინფორმაციით, ბოლო დღეების განმავლობაში, რუსეთის პრეზიდენტმა, ვლადიმერ პუტინმა უკრაინის საზღვართან და ბელარუსის ტერიტორიაზე დამატებითი სამხედრო ძალები განათავსა.

ევროპული საბჭოს პრეზიდენტის, შარლ მიშელის განცხადებით, რუსეთმა ომსა და დიპლომატიას შორის არჩევანი უნდა გააკეთოს. მისი თქმით, უკრაინის წინააღმდეგ რუსეთის უპრეცედენტო სამხედრო ესკალაცია ევროპაში მშვიდობასა და უსაფრთხოებას უქმნის საფრთხეს.