უკრაინის შეიარაღებული ძალების ცნობით, 17 თებერვალს რუსეთმა ცეცხლის შეწყვეტის შეთანხმება 60-ჯერ დაარღვია, მათგან 43 შემთხვევაში მან მინსკის შეთანხმებით აკრძალული იარაღი გამოიყენა. დღეს, დილის 9 საათის მდგომარეობით კი რუსეთის საოკუპაციო ძალების მიერ ცეცხლის შეწყვეტის რეჟიმის 20 დარღვევა დაფიქსირდა, მათგან 15-ში მინსკის შეთანხმებით აკრძალული იარაღი იყო გამოყენებული.

"რუსეთის საოკუპაციო ძალები აგრძელებენ სამმხრივ საკონტაქტო ჯგუფში 2020 წლის 22 ივლისს მიღწეული შეთანხმებების იგნორირებას. გასული დღის განმავლობაში, 17 თებერვალს, რუსეთის ფედერაციის შეიარაღებულმა ძალებმა დაფიქსირდა ცეცხლის შეწყვეტის რეჟიმის 60 დარღვევა, მათგან 43 მინსკის შეთანხმებით აკრძალული იარაღის გამოყენებით", — ვკითხულობთ განცხადებაში.

უწყების ინფორმაციით, რუსეთის ქმედებების შედეგად, დაიჭრა გაერთიანებული ძალების ერთი ჯარისკაცი, მეორემ კი საბრძოლო დაზიანება მიიღო. ისინი სამედიცინო დაწესებულებაში იმყოფებიან და მათი ჯანმრთელობის მდგომარეობა დამაკმაყოფილებელია.

ამასთანავე, უკრაინა იუწყება, რომ რუსული საოკუპაციო ძალების დაბომბვის შედეგად ორი მშვიდობიანი მოქალაქე დაიჭრა. ასევე, გუშინ დაბომბვის შედეგად დაზიანდა საბავშვო ბაღი, განადგურდა ელექტროგადამცემი ხაზები, გაზსადენი და 2 კერძო სახლი ლუგანსკში. საბავშვო ბაღის სამმა თანამშრომელმა დაზიანებები მიიღო. გარდა ამისა, რუსეთის შეიარაღებულმა ძალებმა ვრუბივკას დასახლების საარტილერიო სისტემებიდან ცეცხლი გაუხსნეს და დააზიანეს ადგილობრივი სკოლის შენობა, ბენზინგასამართი სადგური და კერძო შენობა.

გუშინ ოკუპანტებმა დონბასიდან ლუგანსკის ოლქის ერთ-ერთ დასახლებას ცეცხლი გაუხსნეს, ჭურვი კი საბავშვო ბაღს მოხვდა. ამას უკრაინის პრეზიდენტმა, ვოლოდიმირ ზელენსკიმ "დიდი პროვოკაცია" უწოდა და ხაზი გაუსვა უკრაინაში დიპლომატების დარჩენის აუცილებლობას.

რუსეთის მტკიცების პარალელურად, რომ უკრაინის საზღვრის სიახლოვიდან რუსული ჯარები გაჰყავთ, აშშ-ის პრეზიდენტის ადმინისტრაციის ოფიციალური წარმომადგენელი ამბობს, რომ ბოლო დღეებში უკრაინის საზღვართან რუსი სამხედროების რიცხვი 7 000-ით გაიზარდა. ზელენსკიც უარყოფს, რომ რუსეთის ჯარები გადიან. მისი თქმით, ამას რეალურად ვერ ხედავენ და მხოლოდ ესმით მის შესახებ.

გაიგე მეტი: