ქართული ოცნების დეპუტატის, ნინო წილოსანის განცხადებით, ნაციონალურ მოძრაობაში დაწყებული ცვლილებები მიუთითებს, რომ პარტია "მილევად რეჟიმში" გადადის და "თვითგანადგურება" დაწყო. მისი თქმით, ამ ცვლილებებში ჩანს შიდაპარტიული დაპირისპირებაც.

"ეს გადაწყვეტილება, დიდ სურათში რომ შევხედოთ, არის ნამდვილად პარტიის თვითგანადგურების დაწყება და ის ქაოტური და არათანმიმდევრული ნაბიჯები, რაც მათ ბოლო ერთი წლის მანძილზე გადადგეს, რა თქმა უნდა, ამის მკაფიო მაგალითია. ამავდროულად ნათლად ჩანს შიდაპარტიული დაპირისპირება, რომელიც, რა თქმა უნდა, განპირობებულია ამდენწლიანი ფიასკოთი. ეს პროცესები ნათლად მიუთითებს, რომ პარტია ნაციონალური მოძრაობა უკვე მილევად რეჟიმში გადადის", — თქვა წილოსანმა.

გუშინ, 11 იანვარს ნაციონალურ მოძრაობაში სტრუქტურული ცვლილებები განხორციელდა. პოლიტიკურ საბჭოს კობა ნაყოფია უხელმძღვანელებს, გენერალური მდივანი კი პეტრე ცისკარიშვილი იქნება. რაც შეეხება პარტიის თავმჯდომარეს, ნიკა მელიას, როგორც მან განაცხადა, გარკვეული პერიოდით შეითავსებს თბილისის რაიონული ორგანიზაციის თავმჯდომარეობას.