შინაგან საქმეთა სამინისტროს განცხადებით, სამართალდამცველებმა 1980 წელს დაბადებული პირი ძარცვის ბრალდებით დააკავეს.

კერძოდ, ბრალდების მხარე აცხადებს, რომ ბრალდებულმა მიმდინარე წლის 31 მარტს თბილისში, კოტე აფხაზის ქუჩაზე, კლუბ დოლზში, სადაც იგი კერძო დაცვის თანამშრომლად მუშაობდა, ინდოეთის მოქალაქეებს შეკვეთის საფასურად შეუსაბამო თანხის - 3 638 ლარის გადახდა მოსთხოვა, რაზეც უცხოელებმა პრეტენზია გამოთქვეს.

შსს-ს მტკიცებით, ბრალდებული, კლუბის სხვა თანამშრომლებთან ერთად, ინდოეთის მოქალაქეებს ემუქრებოდა და სიტყვიერ შეურაცხყოფას აყენებდა, შემდეგ კი ერთ-ერთ მათგანს საფულე წაართვა და თანხის საკრედიტო ბარათით გადახდა აიძულა.

ინდოელი ტურისტები ჰყვებიან, რომ ლუდის შეკვეთის შემდეგ კლუბის თანამშრომლებმა ვიდეო გადაღება დაიწყეს, რაც მათივე თქმით, საეჭვოდ მოეჩვენათ და ანგარიში მოითხოვეს. ტურისტების მტკიცებით, ანგარიშის თანახმად, მათ დაახლოებით 3600 ლარი უნდა გადაეხადათ, რაზეც მათ უარი თქვეს:

"გაბრაზდნენ და ცალკე ოთახში გაგვიყვანეს. ოთხნი იყვნენ და გვთხოვდნენ გადაგვეხადა. ვუთხარით, რომ ამდენი ფული არ გვქონდა. შემდეგ ჯიბეებში გვიყოფდნენ ხელს და ფული წაგვართვეს."

დაზარალებულებმა პოლიციას დახმარებისთვის მომხდარიდან ორი დღის შემდეგ მიმართეს. გამოძიება ძარცვის ფაქტზე მიმდინარეობს.