უამრავი მაყურებლის დიდხნიანი ლოდინი დასასრულს მიუახლოვდა: სერიალი Euphoria (ეიფორია) სულ მალე ახალი ეპიზოდებით დაბრუნდება!

როგორც იქნა, HBO-მ თავისი ბოლო დროის ერთ-ერთი ყველაზე გახმაურებული სატელევიზიო შოუს მეორე სეზონის პრემიერა დააანონსა: 2022 წლის 8 იანვარი.

გამოსვლის თარიღთან ერთად გავრცელდა პირველი კადრები მეორე სეზონიდან და მართალია, გაგრძელებას ერთგული მაყურებელი ორ თვეზე ნაკლებ დროში იხილავს, მაგრამ ახალი ოფიციალური ტრეილერი მოლოდინის ამ უკანასკნელ კვირებს კიდევ უფრო გაუსაძლისს გახდის.

ტრეილერიდან ვიგებთ, რომ მეორე სეზონში ჩვენთვის უკვე კარგად ნაცნობ სახეებთან ერთად ახალ პერსონაჟებსაც გავიცნობთ. როგორც მოკლე აღწერაში ვკითხულობთ, სიუჟეტი "17 წლის რუს ირგვლივ განვითარდება, რომელიც სიყვარულის, დანაკარგისა და ნარკოდამოკიდებულების წნეხის მიუხედავად, იმედის პოვნას ცდილობს".

ეიფორიის მეორე სეზონის გადაღებები 2020 წლის მარტში უნდა დაწყებულიყო, თუმცა პანდემიის გამო გეგმები შეიცვალა, ამიტომ პრემიერის თარიღი გადაიდო. გაუთვალისწინებელი ცვლილებების გამო გასულ ზამთარს ორი სპეციალური ეპიზოდი გამოუშვეს, რათა ფანების მოლოდინი შეემსუბუქებინათ.

ისღა დაგვრჩენია, უკანასკნელი დღეების ათვლა დავიწყოთ და საყვარელ გმირებთან შესახვედრად მოვემზადოთ.

ფოტო: HBO