ევროპის საბჭოს ადამიანის უფლებების კომისიის თავმჯდომარის, დუნია მიატოვიჩის განცხადებით, ექსპრეზიდენტ მიხეილ სააკაშვილთან დაკავშირებული საქმიანობის გამო, საქართველოს პარლამენტის წევრების საჯარო თავდასხმები სახალხო დამცველის წინააღმდეგ, მიუღებელია.

"მივესალმები სახალხო დამცველის ოფისის ძალისხმევას, რომ დაიცვან ადამიანის უფლებათა დაცვის უმაღლესი სტანდარტები ყველა იმ პირის მიმართ, რომლებზეც საქართველოს ხელისუფლების იურისდიქცია ხორციელდება", — აღნიშნა მან.

მისივე თქმით, ეს საკითხები სტრასბურგში ქართული ოცნების თავმჯდომარესთან, ირაკლი კობახიძესა და ევროპასთან ინტეგრაციის კომიტეტის თავმჯდომარესთან, მაკა ბოჭორიშვილთან შეხვედრისას განიხილა.

"ვენეციის პრინციპების თანახმად, წევრები ვალდებულები არიან, რომ ეფექტურად დაიცვან ომბუდსმენის ინსტიტუტი ნებისმიერი მუქარისა ან ქმედებისგან, რომელიც მიზნად ისახავს ან იწვევს რაიმე დაბრკოლებას სახალხო დამცველის ფუნქციონირებაში. მოვუწოდებ საქართველოს ხელისუფლებას, რომ უზრუნველყონ სახალხო დამვცველის, მისი აპარატისა და მასთან დაკავშირებული ექსპერტების ისეთ გარემოში მუშაობა, რაც ხელსაყრელია მათი მანდატის დამოუკიდებლად, ეფექტურად და უსაფრთხოდ განსახორციელებლად", — აღნიშნავს ის.

როგორც მიატოვიჩმა აღნიშნა, მოუთმენლად ელის, რომ მომავალი წლის თებერვალში დაგეგმილი ვიზიტის ფარგლებში, ეს და ადამიანის უფლებებთან დაკავშირებული სხვა საკითხები განიხილოს.

სახალხო დამცველის შექმნილი ექიმების ჯგუფის დასკვნის შემდეგ, სადაც ეწერა, რომ ექსპრეზიდენტის მდგომარეობა კრიტიკულია და მკურნალობის გაგრძელება რეკომენდებულია დიდი გამოცდილების მქონე პოლიპროფილურ ჰოსპიტალში, ქართული ოცნების წევრებმა, ომბუდსმენისა და ამ ჯგუფის კრიტიკა დაიწყეს.

მეტიც, მმართველი გუნდის თავმჯდომარემ მუქარისშემცველი განცხადება გაავრცელა და თქვა, რომ თუ ეს "ფეიკ" დასკვნა მიხეილ სააკაშვილის სამოქალაქო კლინიკაში გადაყვანის საფუძველი გახდება და ამას მოყვება ის სცენარი, "რომლისაც ეშინიათ", შესაძლოა, როგორც სახალხო დამცველის, ასევე, კონკრეტული ექიმების პასუხისმგებლობის საკითხი დადგეს. პასუხად ომბუდსმენმა განაცხადა, რომ კობახიძის რიტორიკა სცილდება სამართლებრივ ჩარჩოს და არის დაშინების მცდელობა.

ომბუდსმენი გააკრიტიკეს ქართული ოცნების სხვა წევრებმაც, ბექა დავითულიანმა განაცხადა, რომ ლომჯარია პოლიტიკურ პროცესში "ცოტა სხვა მხარეს" არის გადახრილი. სოზარ სუბარის განცხადებით, კი გაოცებულია იმ ფაქტით, რომ ლომჯარიამ პატიმრობაში მყოფი მესამე პრეზიდენტი იმაზე მეტჯერ ინახულა, ვიდრე ყველა სხვა პატიმარი ოთხი წლის განმავლობაში.

ამავე თემაზე:

• სახალხო დამცველზე თავდასხმის ან მუქარის მცდელობები მიუღებელია — დეგნანი
• ომბუდსმენზე თავდასხმა მიუღებელია, ხელისუფლებამ პატივი უნდა სცეს ამ ინსტიტუტს — Amnesty International
• კობახიძის განცხადება ექიმებზე ზეწოლის უპრეცედენტო ფაქტია — სამედიცინო ასოციაციების გაერთიანება
• თუ სააკაშვილს რამე დაემართება, პასუხისმგებლობა დადგება მათი, ვინც ექიმების დასკვნა არ გაითვალისწინა — ბაქრაძე
• კორძაიას შეფასებით, სახალხო დამცველზე მუქარა ყველანაირ ზღვარს სცილდება