დროას ლიდერი, ელენე ხოშტარია მადლობას უხდის რესპუბლიკური საავადმყოფოს ექიმებს, ვახტანგ კალოიანსა და პარლამენტის ადმინისტრაციას. ის წერს, რომ უკვე ნიუ ჰოსპიტალსშია და თავს მშვენივრად გრძნობს.

"დიდი მადლობა რესპუბლიკურის ბრიგადებს, ექიმებს, რომლებიც შემიყვარდა ამ დღეებში. საოცრად მივლიდნენ. ასევე მადლობა პარლამენტის ადმინისტრაციას ხელშეწყობისთვის. მადლობა ვახო კალოიანს ყოველმხრივ დახმარებისთვის. ეხლა ვარ ნიუ ჰოსპიტალში, მშვენივრად ვგრძნობ თავს. დანარჩენი მერე", — აცხადებს ხოშტარია.

რამდენიმე საათის წინ ხოშტარიამ განაცხადა, რომ სააკაშვილის გადაყვანა გორის სამხედრო ჰოსპიტალში მისთვის შიმშილობის შეწყვეტის საფუძველია. შიმშილობის შემდგომი რეაბილიტაციისთვის ის ნიუ ჰოსპიტალში გადაიყვანეს.

დღეს, 19 ნოემბერს, ოპოზიციის აქციის პარალელურად, იუსტიციის მინისტრმა ბრიფინგი გამართა — უწყება ექსპრეზიდენტ მიხეილ სააკაშვილს გორის ჰოსპიტალში გადაყვანას სთავაზობს. ბრეგაძის მტკიცებით, გორის ჰოსპიტალი არის ადგილი, სადაც სააკაშვილის ჯანმრთელობა და უსაფრთხოება მაქსიმალურად იქნება დაცული. ჟურნალისტების კითხვას, როდის და როგორ გადაიყვანენ სააკაშვილს, ბრეგაძე პასუხობს, რომ ეს პროცედურა დაიგეგმება ექიმებთან და უსაფრთხოების თანამშრომლებთან ერთად, როდესაც სააკაშვილი დათანხმდება, გადავიდეს გორის სამხედრო ჰოსპიტალში და შეწყვიტოს შიმშილობა.

ამ წუთებში სააკაშვილის პოზიციის გასაგებად ეკა ხერხეულიძის ციხეში შესვლას ელოდებიან. ის აცხადებს, რომ აფერხებენ და ხელისუფლებას სთხოვს, არ შეაფერხონ, რადგან რაც მალე შეძლებს სააკაშვილთან საუბარს, მით მალე გავიგებთ ექსპრეზიდენტის აზრს სამხედრო ჰოსპიტალში გადასვლაზე.

ელენე ხოშტარიამ შიმშილობა 3 ნოემბერს დაიწყო. მან განაცხადა, რომ შიმშილობას არ შეწყვეტდა მანამ, სანამ სააკაშვილს სამოქალაქო კლინიკაში არ გადაიყვანდნენ.