დღეს პარლამენტის პლენარულ სხდომაზე გირჩი — მეტი თავისუფლების ლიდერის, ზურაბ ჯაფარიძის ადგილმონაცვლედ გირჩის ერთ-ერთი წევრის, ჰერმან საბოს შეყვანას განიხილავს. საპროცედურო საკითხთა და წესების კომიტეტმა ამაზე დღეს იმსჯელა და შესაბამისი დასკვნა ბიუროს გადაუგზავნა.

გირჩი — მეტი თავისუფლების ლიდერს, ზურაბ ჯაფარიძეს საპარლამენტო მანდატი 19 ნოემბერს შეუწყვიტეს. ჯაფარიძისთვის უფლებამოსილების ვადამდე შეწყვეტას 79-მა დეპუტატმა დაუჭირა მხარი, წინააღმდეგი არავინ ყოფილა. აღსანიშნავია, რომ კენჭისყრის დროს სხდომათა დარბაზში სულ 88 დეპუტატი იყო.

ზურაბ ჯაფარიძემ უფლებამოსილების შესაწყვეტად პარლამენტს 3 ნოემბერს მეორედ მიმართა. მან მანდატის დატოვების შესახებ გადაწყვეტილება ქართული ოცნების მიერ შარლ მიშელის შეთანხმების ანულირების შემდეგ მეორედ გამოაცხადა.

პირველად დეპუტატის უფლებამოსილების შეწყვეტის მოთხოვნით ჯაფარიძემ პარლამენტს გასული წლის დეკემბერში მიმართა. იმ დროისთვის ქართულ ოცნებასა და ოპოზიციას შორის მოლაპარაკებები ჯერ კიდევ საქართველოში ევროკავშირისა და აშშ-ს ელჩების, კარლ ჰარცელისა და კელი დეგნანის შუამავლობით მიმდინარეობდა. ქართულმა ოცნებამ დეპუტატებისთვის მანდატების შეწყვეტის საკითხი გადადო, რის შემდეგაც ჯაფარიძემ პარლამენტის გადაწყვეტილება საკონსტიტუციო სასამართლოში გაასაჩივრა. საკონსტიტუციო სასამართლოს ამ საკითხზე გადაწყვეტილება ამ დრომდე არ მიუღია.

იმავე დღეს პარლამენტის დეპუტატის მანდატი შეუწყვიტეს ლელოს ლიდერს, მამუკა ხაზარაძესაც.