ხვალ, 16 ნოემბერს, პლენარულ სხდომაზე პარლამენტი პარტია გირჩი — მეტი თავისუფლების ლიდერის, ზურაბ ჯაფარიძისთვის მანდატის შეწყვეტის საკითხს განიხილავს.

ჯაფარიძისთვის მანდატის შეწყვეტის შესახებ დადგენილების პროექტს საპროცედურო საკითხთა და წესების კომიტეტმა მხარი დღეს დაუჭირა და გადაწყვეტილება ბიუროს გადაგზავნა. ბიურომ დღესვე განსაზღვრა, რომ პარლამენტი საკითხს ხვალინდელ სესიაზე განიხილავს.

ზურა ჯაფარიძემ პირველ ნოემბერს თქვა, რომ მან პარლამენტი დატოვა მაშინ, როდესაც ქართულმა ოცნებამ 19 აპრილის შეთანხმება ანულირებულად გამოაცხადა. მაშინ განცხადება არ დააკმაყოფილეს და ჯაფარიძემ 3 ნოემბერს, ჯაფარიძემ უფლებამოსილების შესაწყვეტად პარლამენტს ოფიციალურად მიმართა.

პირველ ნოემბერს ექსპრეზიდენტმა, მიხეილ სააკაშვილმა ოპოზიციას პარლამენტის დატოვებისკენ მოუწოდა. მისი თქმით, პარლამენტმა უკვე დაკარგა სახელისუფლებო პლატფორმის ფუნქცია და იქ ვერანაირ გადაწყვეტილებას ვეღარ მიიღებენ.

31 ოქტომბერს, პარლამენტთან ოპოზიციის მიერ გამართულ აქციაზე მამუკა ხაზარაძემ საპარლამენტო მანდატის დატოვების შესახებ განცხადება გააკეთა. სააკაშვილის მოწოდების შემდეგ იგივე გადაწყვეტილება ნაციონალური მოძრაობის დეპუტატებმა, ნონა მამულაშვილმა, ანა წითლიძემ და ლევან ვარშალომიძემაც მიიღეს. სადეპუტატო მანდატზე უარს ამბობს გირჩი — მეტი თავისუფლების ლიდერი, ზურაბ ჯაფარიძეც, თუმცა მან თქვა, რომ მანდატზე უარი განაცხადა შარლ მიშელის დოკუმენტის ანულირებისთანავე.

თუმცა პარლამენტის დატოვების მოწოდებიდან მეორე დღეს, სააკაშვილმა თქვა, რომ პარლამენტში ყოფნა "კონკრეტულ მომენტში საჭიროა". სააკაშვილმა განაცხადა, რომ დეპუტატების მხრიდან მანდატების დატოვების გადაწყვეტილება პატრიოტული მიდგომაა, თუმცა მასთან ციხეში შესასვლელად და მუდმივი კონტაქტისთვის მანდატია საჭირო.