კვირას ახალი ზელანდიის პოლიციამ მოქალაქისგან უცნაური ზარი მიიღო: ქალის თქმით, პოსუმმა ის "მძევლად აიყვანა" და სახლიდან არ უშვებდა. როგორც აღმოჩნდა, გარეთ გამოსვლისთანავე სახლთან ჩასაფრებული პოსუმი ქალს თავს ესხმოდა და მას სახლში დაბრუნებას აიძულებდა.

შემთხვევის ადგილზე მისვლისთანავე, პაწაწინა პოსუმი ბნელი სამალავიდან გამოცუნცულდა და პოლიციელს ფეხზე შემოეხვია. პოლიციელმა გადაწყვიტა, რომ ის ან სახლიდან გამოქცეული იყო, ანდაც — დედას ახლახან მოწყვეტილი და ქალაქს შეუჩვეველი.

მალე პოსუმი სპეციალისტებმა ველურ ბუნებაში დააბრუნეს, რათა მოქალაქეები მოულოდნელი თავდასხმისგან დაეცვათ. ვეტერინარის თქმით, პოსუმის ქცევის მიზეზი აგრესიის ნაცვლად, შიში იყო. როგორც ჩანს, ქალაქში აღმოჩენილი პაწაწინა პოსუმი საფრთხესთან გამკლავებას თავისებური გზებით ცდილობდა, რის გამოც ქალი სახლში გაუცნობიერებლად ჩაკეტა.

მოქალაქის "მძევლად აყვანის" გამო ცელქი პოსუმისთვის ბრალი არ წაუყენებიათ, "დაზარალებულ" ქალს კი სახლიდან მშვიდად გამოსვლის საშუალება მიეცა.