Art Bridge-ის ორგანიზებით, თბილისში მეშვიდე Kavkaz Jazz ფესტივალი 8-11 ივნისს გაიმართება. ღონისძიებაში მონაწილეობას მიიღებენ როგორც ქართველი, ისე უცხოელი შემსრულებლები აშშ-დან, აზერბაიჯანიდან, თურქეთიდან, სომხეთიდან და ირანიდან.

ფესტივალის ფარგლებში Jamey Aebersold Jazz-ის შემსწავლელი პროგრამა, თბილისის სახელმწიფო კონსერვატორიასთან ერთობლივად, გაიმართება. მას ლუვილის უნივერსიტეტის (აშშ) ცნობილი ამერიკელი პედაგოგები და მუსიკოსები მაიკლ ტრეისი (საქსოფონი) და კრეიგ ვაგნერი (გიტარა) გაუძღვებიან.

ამასთან, Kavkaz Jazz ფესტივალი უმასპინძლებს მრგვალ მაგიდებს მუსიკალური ექსპერტების მონაწილეობით საქართველოდან, სომხეთიდან, გერმანიიდან, აზერბაიჯანსა და აშშ-დან.

გარდა ამისა, 11 ივნისს ფესტივალის გალა კონცერტი ახალციხეში, რაბათის ციხეში გადაინაცვლებს. კონცერტთან ერთად დაგეგმილია ხალიჩების ფესტივალიც.

პროექტი მერიის კულტურული ღონისძიებების ცენტრის მხარდაჭერით გაიმართება და მისი წარმდგენი კულტურის სამინისტრო იქნება. ფესტივალის პარტნიორები არიან თურქული კულტურის ცენტრი Yunus Emre, თბილისის სახელმწიფო კონსერვატორია, გოეთეს ინსტიტუტი, ირანის ისლამური რესპუბლიკის საელჩო საქართველოში.