ნაციონალური მოძრაობის აქცია დღეს, 19:00 საათზე რუსთაველზე გაიმართება. ამის შესახებ პარტიის ერთ-ერთმა ლიდერმა, ხატია დეკანოიძემ იუსტიციის სამინისტროსთან მიმდინარე აქციაზე ისაუბრა.

"მინდა მოგიწოდოთ, რომ ჩვენ ძალები მოვიკრიბოთ 7 საათამდე, 7 საათზე ყველა ვიკრიბებით რუსთაველზე, ამიტომ ვთხოვთ ყველას, რომ გამოვიდეს დღეს 7 საათზე რუსთაველზე. მთავარია, რომ ჩვენ ის ვინც გვაკრიტიკებს, პოლიტიკური ლიდერები, ახლა არის შანსი, რომ დღეს გამოვიდეს და დაამარცხოს რეჟიმი", — განაცხადა დეკანოიძემ.

საპროტესტო აქციები დღესაც გრძელდება. ექსპრეზიდენტის, მიხეილ სააკაშვილის მხარდამჭერები დილიდან კანცელარიასთან იყვნენ შეკრებილები. მოგვიანებით, აქციამ იუსტიციის სამინისტროსთან გადაინაცვლა. როგორც ნაციონალური მოძრაობის თავმჯდომარე, ნიკა მელია აცხადებს, ისინი არ დაიშლებიან მანამ, სანამ მათი მოთხოვნები არ შესრულდება.

ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის N12 პენიტენციური დაწესებულებიდან გლდანის მე-18 დაწესებულების საავადმყოფოში 8 ნოემბერს გადაიყვანეს.

რუსთავის ციხიდან გამოსვლის შემდეგ სააკაშვილის პირადმა ექიმმა, ნიკოლოზ ყიფშიძემ განაცხადა, რომ ანალიზებზე დაყრდნობით კონსილიუმი ერთად ექსპრეზიდენტის კლინიკაში გადაყვანის აუცილებლობაზე შეთანხმდა.

გუშინ თავისუფლების მოედანზე სააკაშვილის მხარდასაჭერი აქცია გაიმართა და მსვლელობით კანცელარიასთან გაგრძელდა, სადაც აქციის მონაწილეები მთელი ღამის განმავლობაში იყვნენ შეკრებილები.