მსოფლიოს გავლენიანი მედიები, მათ შორის, The Hollywood Reporter წყაროებზე დაყრდნობით წერს, რომ მარველის ახალ ფილმ Eternals-ს საუდის არაბეთში, ქუვეითსა და კატარში არ აჩვენებენ. ამის მიზეზად წყაროები გეი კოცნის სცენას ასახელებენ, რომლის ამოჭრასაც დისნეი არ დათანხმდა. აღნიშნულ საკითხთან დაკავშირებით დისნეის ოფიციალური კომენტარი ჯერჯერობით არ გაუკეთებია.

Eternals მარველის სამყაროში პირველი ფილმია, რომელშიც გეი კოცნაა ნაჩვენები. ფილმში ერთმანეთს ფასტოსი და ბენი კოცნიან.

აღსანიშნავია, რომ საუდის არაბეთში, ქუვეითსა და კატარში ჰომოსექსუალური ურთიერთობა ოფიციალურადაა აკრძალული. საუდის არაბეთსა და კატარში სასჯელის სახით სიკვდილით დასჯაც კია გათვალისწინებული.

ეს პირველი შემთხვევა არაა, როდესაც ჩამოთვლილ ქვეყნებში ფილმი გეი სცენის გამო აკრძალეს. 2020 წელს პიქსარის ანიმაცია Onward მხოლოდ იმის გამო აიკრძალა, რომ ერთ-ერთი სცენა ლესბოსელ წყვილზე მიუთითებდა.

Eternals-ის ოსკაროსანმა რეჟისორმა ქლოა ჭაომ ერთ-ერთ ინტერვიუში განაცხადა, რომ არ უნდოდა, ფილმის რომელიმე სცენა ცენზურის გამო ამოეჭრათ. რეჟისორის თქმით, ამ საკითხზე მასსა და მარველს ერთნაირი მოსაზრება ჰქონდათ.

Eternals განსაკუთრებული ძალების მქონე უკვდავი ხალხის ისტორიას მოგვითხრობს, რომლებიც დედამიწაზე ათასობით წელია საიდუმლოდ ცხოვრობენ. ფილმში ისეთი ვარსკვლავები მონაწილეობენ, როგორებიც არიან ანჯელინა ჯოლი, ჯემა ჩანი, რიჩარდ მადენი, სელმა ჰაიეკი, კიტ ჰარინგტონი და სხვები. ფილმის ქართული პრემიერა კინოთეატრებში 4 ნოემბერს შედგა.