იუსტიციის სამინისტროს მიერ პარლამენტში ინიცირებული კანონპროექტით, ნარკოტიკული საშუალების შემცველი მცენარის უკანონო დათესვის, მოყვანისა ან კულტივირებისთვის, მოქმედი კანონით გათვალისწინებული პატიმრობა, 160-დან 220-საათამდე საზოგადოებისათვის სასარგებლო შრომით შეიცვლება.

მოქმედი ნორმით, აღნიშნული ქმედება ისჯება ჯარიმით ან თავისუფლების აღკვეთით ვადით ორიდან ხუთ წლამდე.

განმარტებით ბარათში წერია, რომ სისხლის სამართლის კოდექსში დაგეგმილი ცვლილებების პროექტი საკონსტიტუციო სასამართლოს მიერ მიღებული გადაწყვეტილებებიდან გამომდინარეობს, კერძოდ, (2015 წლის 24 ოქტომბრის №1/4/592 გადაწყვეტილება საქმეზე "საქართველოს მოქალაქე ბექა წიქარიშვილი საქართველოს პარლამენტის წინააღმდეგ".

პარლამენტში წარდგენილი ცვლილებების პროექტით, აღნიშნული ქმედება, ჩადენილი დიდი ოდენობით, წინასწარი შეთანხმებით ჯგუფის მიერ, სამსახურებრივი მდგომარეობის გამოყენებით, არაერთგზის ან იმ პირის მიერ, ვისაც წინათ ჩადენილი აქვს ნარკოტიკულ დანაშაულთან დაკავშირებული თავით გათვალისწინებული რომელიმე დანაშაულისათვის გათვალისწინებულია ჯარიმა, ასევე საზოგადოებისათვის სასარგებლო შრომა 400-დან 500-საათამდე ვადით ან პატიმრობის შეფარდება სამ წლამდე ვადით. დღეისათვის, იგი ისჯება თავისუფლების აღკვეთით, ვადით ოთხიდან შვიდ წლამდე.

ხოლო, იგივე დანაშაულისთვის, ჩადენილი განსაკუთრებით დიდი ოდენობით ან ორგანიზებული ჯგუფის მიერ, სისხლისსამართლებრივი სანქცია იქნება სამიდან ექვს წლამდე პატიმრობა, მაშინ როცა მოქმედი ნორმით, იგი ითვალისწინებს ექვსიდან თორმეტ წლამდე თავისუფლების აღკვეთას.