ოპოზიციის მერობის კანდიდატი, ანზორ მელიას ხმის მიცემის დასრულებისა და ეგზიტპოლების გამოცხადების შემდეგ ამბობს, რომ ის ქართული ოცნების ზუგდიდის მერობის კანდიდატის, მამუკა წოწორიას მერიც იქნება, რითაც დაპირისპირებას დაასრულებს.

"დიდი მადლობა ჩემო ზუგდიდელებო იმ მხარდაჭერისთვის, იმ სიმამაცისთვის, რაც თქვენ ამ ომში დღეს გამოიჩინეთ. მადლობა ყველას და მერწმუნეთ, რომ მე ვიქნები თქვენი ოჯახის მეგობარი მერი. [ოცნების] კანდიდატსაც მივმართავ, რომ მაგის მერიც ვიქნები და დამთავრდება ის დაპირისპირება, რაც აქამდე იყო. მე მინდა მადლობა ვუთხრა ჩემს გუნდს, რომლებიც ორი თვის განმავლობაში არ მომშორებიან გვერდიდან და იბრძოდნენ ვაჟკაცურად გამარჯვებისთვის, მადლობა მინდა მოვახსენო ჩემს უძვირფასეს პრეზიდენტს, ბატონ მიხეილს იმ თანადგომისთვის, იმ სიყვარულისთვის, რასაც მე ვგრძნობდი ციხიდან გამოგზავნილ წერილებში. მადლობა ყველას და მერწმუნეთ, მე გავამართლებ თქვენს ნდობას", — განაცხადა მან.

ხმის მიცემის დასრულების შემდეგ ეგზიტპოლები ორმა სხვადასხვა ტელევიზიამ გამოაქვეყნა, რომელთა მონაცემებიც ერთმანეთისგან რადიკალურად განსხვავებულია. იმედს ზუგდიდში ეგზიტპოლი არ ჩაუტარებია. რაც შეეხება მთავარ არხს, შედეგები ასე გადანაწილდა:

  • ანზორ მელია — 53%;
  • მამუკა წოწორია — 47%.

არჩევნების მეორე ტური 15 თვითმმართველ თემსა და 5 თვითმმართველ ქალაქში, მათ შორის, თბილისში გაიმართა. ასევე, 24 საარჩევნო ოლქში, რომლის შედეგად აირჩევა 42 მაჟორიტარი. მერობისა და მაჟორიტარობისთვის ჯამში 9 პარტიის, ასევე, ორი დამოუკიდებელი კანდიდატი იბრძვის.

დღის განმავლობაში გავრცელდა არაერთი ინფორმაცია დარღვევების, მათ შორის, ამომრჩეველზე ზეწოლისა და სავარაუდო მოსყიდვის შესახებ. ასევე, მოხდა დაპირისპირებები საარჩევნო უბნებთან. კოორდინატორები და აგიტატორები თავს დაესხნენ და ფიზიკური შეურაცხყოფა მიაყენეს ჟურნალისტებსაც.

გაიგეთ, როგორი იყო ამომრჩეველთა აქტივობა დღის განმავლობაში:

არჩევნების მიმდინარეობაზე დეტალური ინფორმაციის გასაგებად, თვალი ადევნეთ ჩვენს გვერდს, სადაც ინფორმაცია პირდაპირ ეთერში ახლდება.