ექსპრეზიდენტ მიხეილ სააკაშვილის პირადი ექიმის, ნიკოლოზ ყიფშიძის თქმით, სასურველია ექიმების კონსილიუმი განსაზღვრულზე ადრე შეიკრიბოს. როგორც ცნობილია, სააკაშვილის ჯანმრთელობის მონიტორინგისთვის შექმნილი ექიმთა მულტიფუნქციური ჯგუფის შეკრება სამშაბათს, 19 ნოემბერსაა დაგეგმილი.

"მე ახლა წავალ სახლში და დავურეკავ ამ ციხის ექიმს და შემდეგ იმათმა უნდა გადაწყვიტონ [როდის შეიკრიბოს კონსილიუმი]. ჩემი რჩევა და რეკომენდაციაა, რომ ეს კონსილიუმი შედგეს უფრო ადრე, ვიდრე სამშაბათს.

ექიმებმა უნდა თქვან, რა გავაკეთოთ შემდეგ. [საავადმყოფოში] გადაყვანის შესახებ თქვან ან რა მინერალები უნდა მივცეთ, როგორ უნდა მივცეთ, რა უნდა გადავუსხათ", — განაცხადა ყიფშიძემ სააკაშვილთან შეხვედრის შემდეგ.

მისი შეფასებით, ამ დროისთვის სააკაშვილის ჰოსპიტალიზაცია არ არის საჭირო. ექიმი ხაზს უსვამს, რომ ექსპრეზიდენტის ჯანმრთელობის მდგომარეობა მუდმივად იცვლება. ყიფშიძე სააკაშვილის მონახულებას ხვალაც აპირებს. სააკაშვილის ადვოკატების ინფორმაციით, თავად ექსპრეზიდენტის სურვილია, რომ პირადმა ექიმმა ყოველ დღე მოინახულოს.

რაც შეეხება შიმშილობას, ნიკოლოზ ყიფშიძის თქმით, ამ საკითხზე სააკაშვილს პოზიცია არ შეუცვლია.

13 ოქტომბერს, იუსტიციისა და ჯანდაცვის სამინისტროებს, ასევე სახალხო დამცველსა და დეპუტატებს შორის უწყებათაშორისი შეხვედრის შემდეგ გადაწყდა, რომ შეიქმნებოდა ექიმების მულტიფუნქციური ჯგუფი მიხეილ სააკაშვილის ჯანმრთელობის მონიტორინგისთვის.

14 ოქტომბერს თავისუფლების მოედანზე მიხეილ სააკაშვილის მხარდასაჭერი აქცია გაიმართა, სადაც ათასობით ადამიანი საქართველოს სხვადასხვა რეგიონიდან ჩამოვიდა. სიტყვით გამოსვლისას სააკაშვილის ადვოკატმა, ნიკა გვარამიამ ექსპრეზიდენტის მორიგი წერილი წაიკითხა. წერილში ის საზოგადოებას "დიდი შერიგებისკენ" მოუწოდებს და ამბობს, რომ გვერდზე უნდა გადავდოთ წყენა და უარყოფითი ემოციები, რადგან კიდევ ერთი რევანში მორალურად გაგვანადგურებს.

მიხეილ სააკაშვილი 17 დღეა შიმშილობს. 10 ოქტომბერს, დაკავებიდან და შიმშილობის გამოცხადებიდან მე-10 დღეს, ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.

გაიგე მეტი: