განათლების მინისტრის მოადგილის, ეკა დგებუაძის განცხადებით, განათლების სამინისტრო დღესაც ყველაფერს გააკეთებს იმისთვის, რომ სკოლებში სწავლა საკლასო ოთახებში შენარჩუნდეს, თუმცა მისი თქმით, სამინისტრო ამ პროცესების დამოუკიდებლად მართვას ვერ შეძლებს.

"განათლების სამინისტრო იყო ერთ-ერთი ყველაზე აქტიური, ვისაც ჰქონდა სურვილი და ყველაფერს აკეთებდა და დღესაც ყველაფერს გააკეთებს იმისთვის, რომ შევინარჩუნოთ სასწავლო პროცესი სკოლებში, თუმცა ყოველთვის ამას ვამბობდით, რომ განათლების სამინისტრო დამოუკიდებლად ვერ შეძლებს ამ პროცესების მართვას, რადგან არამარტო სისტემების, არამედ საზოგადოების მაღალი პასუხისმგებლობა დგება", — განაცხადა დგებუაძემ რუსთავი 2-ის ეთერში.

საქართველოს საკლასო ოთახებში სწავლა 4 ოქტომბერს განახდლა. დღეის მონაცემებით, ქვეყანაში დისტანციურ სწავლებაზე 108 სკოლა და 687 კლასია გადასული. რაც შეეხება ინფიცირების მაჩვენებელს, განათლების სამინისტროს ცნობით, ბოლო კვირის მონაცემებით, ვირუსი დაუდასტურდა მასწავლებლების 0,9%-ს, ხოლო მოსწავლეების — 0,6%-ს. ამასთან, ამ ეტაპზე მასწავლებლებისა და სკოლის ადმინისტრაციული პერსონალის 69%-ია აცრილი.