კალიფორნიის შტატში ახალი კანონი ამოქმედდა, რომლის მიხედვითაც საჯარო სკოლებმა და კოლეჯებმა მოსწავლეები და სტუდენტები უფასო ჰიგიენური ნივთებით უნდა უზრუნველყონ. კანონს კალიფორნიის გუბერნატორმა გევინ ნიუსომმა ხელი უკვე მოაწერა.

აღნიშნული გადაწყვეტილების მიზანი ტამპონებზე, საფენებსა და სხვა ჰიგიენურ ნივთებზე ხელმისაწვდომობის უზრუნველყოფაა.

"ჩვენი სხეული ყოველთვის წინასწარ არ გვაფრთხილებს იმის შესახებ, რომ მენსტრუაცია გვექნება, რაც ხშირად იმას ნიშნავს, რომ უნდა შევწყვიტოთ, რასაც ვაკეთებთ და მენსტრუაციას გავუმკლავდეთ. როგორც ტუალეტის ქაღალდი და ქაღალდის ხელსახოცებია ყველა საზოგადოებრივ ტუალეტში ხელმისაწვდომი, ასევე უნდა იყოს ჰიგიენური ნივთებიც", — ამბობს კანონპროექტის ინიციატორი კრისტინა გარსია.

ახალი კანონი 2022-2023 სასწავლო წელს ამოქმედდება და საჯარო სკოლებისა და კოლეჯების გარდა, კალიფორნიის სახელმწიფო უნივერსიტეტებსაც ეხება. კანონპროექტის ავტორები ინიციატივაში ჩართვისკენ კერძო სკოლებსა და უნივერსიტეტებსაც მოუწოდებენ.

აღსანიშნავია ისიც, რომ კალიფორნიის შტატმა ცოტა ხნის წინ ჰიგიენურ ნივთებზე დაწესებული გადასახადებიც გააუქმა, რომლითაც ხაზინაში წელიწადში დაახლოებით $20 მილიონი გროვდებოდა.

"მენსტრუალური სიღარიბე" — ყოველთვიურად საჭირო სანიტარული ნივთებისთვის საჭირო ფინანსების არარსებობა — ერთ-ერთი მწვავე საკითხია, რომელზეც ბოლო პერიოდში ქალთა უფლებადამცველები აქტიურად საუბრობენ: შოტლანდიაში ჩატარებული კვლევის მიხედვით, ყოველ მეხუთე ქალს ერთხელ მაინც გამოუცდია ეს პრობლემა, რაც მის ჰიგიენაზე, ჯანმრთელობასა და კეთილდღეობაზე უარყოფითად აისახა. ამავე ქვეყნის მაგალითზე ქალებს საჭირო ჰიგიენური ნივთების შესაძენად თვეში 13 გირვანქა სტერლინგის დახარჯვა უწევთ (დაახლოებით 60 ლარი), სიცოცხლის განმავლობაში კი ეს ხარჯები ათასობით დოლარს აღწევს.

კიდევ ერთი კვლევა აჩვენებს, რომ დიდ ბრიტანეთში გოგოების 10%-ს შესაძლებლობა არ აქვს, ამ ხარჯებს გასწვდეს, 15% მხოლოდ დიდი ძალისხმევის შემდეგ ახერხებს მათ შეძენას, 19%-ს კი საფენების ჩანაცვლება სხვა უფრო იაფფასიანი საშუალებებით უწევს.

აღსანიშნავია, რომ 2020 წელს შოტლანდია პირველი ქვეყანა გახდა, სადაც ტამპონები და საფენები უფასო გახდა.