ევროპული საქართველოს ლიდერის, გიგა ბოკერიას განცხადებით, მეორე ტურის ალბათობა თბილისში ძალიან მაღალია და "საოცრება" უნდა მოხდეს, რომ დედაქალაქში პირველი ტური აღმოჩნდეს საბოლოო. ამის შესახებ მან TV პირველის ეთერში ისაუბრა.

"ოღონდ ამას მე ვამბობ არა იმაზე დაყრდნობით, რომ დღევანდელი ამბავი ვიცი — დღევანდელი ამბავი ვერც მეცოდინება, ჯერ არც დათვლაა დაწყებული და არც ეგზიტპოლები არ არის — ეს ვიცით ყველა კვალიფიციურ კვლევაზე დაყრდნობით, რაც იქამდე ჩატარებულა. "საოცრება" უნდა მოხდეს, რომ თბილისში პირველი ტური აღმოჩნდეს საბოლოო. მაგრამ ჩვენ მხოლოდ თბილისის ამოცანა არ გვაქვს, ჩვენ გვაქვს ყველა საკვანძო ქალაქისა და რაიონის ამოცანა. პირველ ტურში დამთავრდება სად არჩევნები? თერჯოლაში, ხონში, ამ ადგილებში, სადაც ორი კანდიდატია. ყველაგან სხვაგან მეორე ტურის ალბათობა მაღალია", — აცხადებს ის.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.