პოლონეთის კოალიციური მთავრობა, შესაძლოა, დაიშალოს. მას შემდეგ, რაც პრემიერ მინისტრმა, მატეუშ მორავეცკიმ ვიცე-პრემიერი, იაროსლავ გოვინი თანამდებობიდან გაათავისუფლა, პოლონეთის კოალიციური მთავრობა ორად გაიყო.

საერთაშორისო მედიის ინფორმაციით, პარლამენტში კონფლიქტი მედიასთან დაკავშირებული ახალი კანონპროექტის კენჭისყრას მოჰყვა, რომელიც არაევროპელ მესაკუთრეებს პოლონეთის მედია-კომპანიების საკონტროლო წილის ქონას აუკრძალავს. კოალიციაში შემავალმა პარტია თანხმობამ და მისმა ლიდერმა იაროსლავ გოვინმა ეს კანონი მედიის თავისუფლებაზე თავდასხმად მიიჩნიეს და შეეწინააღმდეგენ. მთავრობის პრესმდივნის თქმით, დათხოვნის მიზეზად ასევე იქცა გოვინსა და უმრავლესობაში მყოფ პარტია კანონი და სამართალს შორის დაპირისპირება საგადასახადო პოლიტიკასთან დაკავშირებითაც.

მთავრობის უმსხვილესი პარტია, კანონი და სამართლის განმარტებით, მოცემული კანონპროექტი მიმართულია ჩინური და რუსული მაუწყებლობების წინააღმდეგ, თუმცა საზოგადოებისა და პოლიტიკოსების ნაწილი მიიჩნევს, რომ ეს კანონი მიზნად ისახავს პოლონეთის ყველაზე ცნობილი კრიტიკული მედია საშუალების, TVN24-ის გაჩუმებას, რომლის მფლობელიცაა ამერიკული კომპანია DISCOVERY და რომლის ლიცენზიასაც ვადა 26 სექტემბერს გასდის. ისინი მიიჩნევენ, რომ მედიის შეზღუდვა ევროკავშირისა და ამერიკის დემოკრატიულ ღირებულებებს ეწინააღმდეგება.

მიუხედავად იმისა, რომ კანონპროექტი მკაცრად გააკრიტიკა პოლონეთის მნიშვნელოვანმა მოკავშირე აშშ-მ და პოლონეთის ათობით ქალაქში მასობრივი პროტესტი მოჰყვა, მთავრობის პრესმდივანი პიოტრ მიულერი აცხადებს, რომ მისი აზრით, გაერთიანებული მემარჯვენე ალიანსი მის მიღებას მაინც შეძლებს.

ოპოზიციის შეფასებით, ამ ქმედებამ ეჭვქვეშ დააყენა, თუ რამდენად შეძლებს კოალიციური მთავრობა, რომელიც პოლონეთს 2015 წლიდან მართავს, პარტია თანხობის მხარდაჭერის გარეშე ფუნქციონირების გაგრძელებას.