აშშ-ის ყოფილმა პრეზიდენტმა, დონალდ ტრამპმა, ტვიტერის, გუგლისა და ფეისბუქის წინააღმდეგ სასამართლოში საჩივარი შეიტანა. ტრამპის განცხადებით, იგი ტექგიგანტების "ცენზურის" მსხვერპლია.

სოციალურ ქსელში ტრამპის ანგარიშები იანვრის თვეში დაიბლოკა. მიზეზი საზოგადოებრივი უსაფრთხოების უზრუნველყოფა იყო იმ პირობებში, როცა კაპიტოლიუმზე მისმა მხარდამჭერებმა იერიში მიიტანეს.

7 ივლისფლორიდის ფედერალურ სასამართლოში შეტანილ საჩივარს ტრამპმა "ჩვენი სიტყვის თავისუფლების მშვენიერი განვითარება" უწოდა. ნიუ-ჯერსის აგარაკზე გამართულ პრესკონფერენციაზე ყოფილმა პრეზიდენტმა სოციალური მედიის კომპანიების ქმედებები დაგმო და დემოკრატები დეზინფორმაციის მხარდაჭერაში დაადანაშაულა.

"ვითხოვთ, რომ დასრულდეს ჩრდილის მიყენება, [ვიღაცების] გაჩუმება, შავ სიაში შეყვანა, დევნა და მათთვის ხაზის გადასმა", — განაცხადა ტრამპმა.

სარჩელში იგი სასამართლოს სთხოვს, აკრძალოს "ცენზურა" — მისი თქმით, თუკი ისინი პრეზიდენტს "ბლოკავენ", ნებისმიერს გაუკეთებენ იმავეს.

ტრამპის საჩივარს ჯერჯერობით არცერთი კომპანია არ გამოხმაურებია.

ფოტო: iStock

იანვარში, როცა ამბოხებულებმა კაპიტოლიუმზე იერიში მიიტანეს, ტვიტერმა განაცხადა, რომ პრეზიდენტი "ძალადობის წახალისებისათვის" დაიბლოკა. იმ დროისთვის ტრამპი და მისი მხარდამჭერები უსაფუძვლო ბრალდებებსაც ავრცელებდნენ საპრეზიდენტო არჩევნების გაყალბებასთან დაკავშირებით.

ექსპერტების ვარაუდით, ტრამპის ამჟამინდელი სარჩელს, დიდი ალბათობით, შედეგი არ მოჰყვება, რადგან ტექკომპანიებს, როგორც კერძო ბრენდებს, თავად შეუძლიათ გადაწყვიტონ, ვინ გამოიყენებს მათ პლატფორმას.

აღსანიშნავია, რომ ტრამპს თავადაც სურდა საკუთარი სოციალური ქსელის შექმნა, თუმცა, ამ გეგმას, ჯერჯერობით განხორციელების პირი არ უჩანს. მოგვიანებით მან თავისი ბლოგიც შექმნა და მისთვის ტვიტერის ანგარიშიც გააკეთა, თუმცა, პლატფორმაზე ისიც მალევე წაიშალა.