დაავადებათა კონტროლის ეროვნული ცენტრი ხელმძღვანელი, ამირან გამყრელიძე საქართველოში Covid-19-ის ე.წ. სამხრეთ აფრიკული შტამის, B1351-ის ერთი შემთხვევის გამოვლენას ადასტურებს.

"გიდასტურებთ, რომ ლაბორატორიულად ერთი შემთხვევა დაფიქსირდა, რომელიც საქართველოს მოქალაქეს დაუდასტურდა, მოგზაურობის ისტორიით დუბაიში. კლინიკური მდგომარეობა მისი დამაკმაყოფილებელია, უკვე სრულად განკურნებულია", — განაცხადა ამირან გამყრელიძემ.

მისივე თქმით, გამოკვლეულია ოჯახის კონტაქტები და მათი ტესტის პასუხები უარყოფითია.

"ამ შტამის შესახებ ვიცით, რომ გასული წლის სექტემბერში იდენტიფიცირებული იქნა სამხრეთ აფრიკის რესპუბლიკაში, ამიტომაც მიიღო ეს სახელწოდება. ის განსაკუთრებით გავრცელებულია რიგ აფრიკულ ქვეყნებში, მაგრამ არის, ასევე, ამერიკის შეერთებულ შტატებში, ასევე, ევროპის რიგ ქვეყნებში", — აღნიშნავს გამყრელიძე.

NCDC-ის ხელმძღვანელი აცხადებს, რომ ის თითქმის ერთნაირად აზიანებს როგორც ბავშვთა, ისე მოზრდილ მოსახლეობას და მეტი სიმწვავით ხასიათდება.