Twitter-მა აშშ-ს ყოფილი პრეზიდენტის, დონალდ ტრამპის ახალ ვებგვერდთან დაკავშირებული ანგარიში წაშალა.

NBC News წერს, რომ ანგარიში @DJTDesk სოციალურ ქსელში 6 მაისს დილით გაჩნდა. აღწერაში კი მითითებული იყო, რომ განცხადებები ტრამპის ახალ ვებგვერდიდან იქნებოდა წამოღებული. ასევე, აღნიშნული იყო, რომ თვითონ დონალდ ტრამპი არ ტვიტავდა. გამოჩენიდან რამდენიმე საათში ანგარიში დაბლოკეს.

Twitter-ის წარმომადგენელმა განაცხადა, რომ შესაბამის ზომებს მიიღებენ იმ ანგარიშების მიმართ, რომელთა მიზანია ჩაანაცვლონ ან გაავრცელონ კონტენტი, რომელიც დაბლოკილ ანგარიშებთან არის კავშირში.

ტრამპის პრესსპიკერმა NBC News-ს განუცხადა, რომ ანგარიში ტრამპთან აფილირებული პირის მიერ ან მისი ნებართვის არ შექმნილა.

4 მაისს დონალდ ტრამპმა ახალი ვებგვერდი donaldjtrump.com ჩაუშვა, სადაც საკუთარ განცხადებებს, ფოტოებსა და ვიდეოებს გაავრცელებს.

მომხმარებლებს შეუძლიათ ტრამპის განცხადებები გააზიარონ Twitter-ზე და Facebook-ზე, თუმცა პასუხის გაცემა არ შეუძლიათ.

დონალდ ტრამპმა საკუთარი პლატფორმის შექმნა მას შემდეგ გადაწყვიტა, რაც ის არაერთ სოციალურ ქსელში, მათ შორის Facebook-ზე, Twitter-ზე, YouTube-სა და Instagram-ზე დაბლოკეს. ამის მიზეზი კი კაპიტოლიუმზე მისი მხარდამჭერების თავდასხმისას გაკეთებული განცხადებები გახდა.