ეკა ბესელია ფარული მიყურადების შესახებ კანონპროექტის განხილვისას, კომპანია ჯეოსელის განცხადებას გამოეხმაურა და განაცხადა, რომ იგი "მინიმუმ არ იყო კორექტული და რეალური". ამის შესახებ მან პარლამენტის 23 თებერვლის პლენარულ სხდომაზე ისაუბრა.

ბესელიას თქმით, კომპანიებთან კონსულტაციები გახსნილია და მათთან ძირითად საკითხებზე შეთანხმება მიღწეულია:

"მე რბილად რომ ვთქვა, გაკვირვებული ვარ იმიტომ, რომ მინიმუმ არ იყო კორექტული ის განცხადება, რომელიც გუშინ გავრცელდა. ამ კითხვას დავსვამ მე მათთანაც, საჯაროდაც, როდესაც გვექნება განხილვა მეორე მოსმენით. არ იყო კორექტული და შეიძლება ეს იყო იმის ბრალი, რომ მათ არ ჰქონდათ საკმარისი ინფორმაცია და მე ამას გავარკვევ, როცა დაველაპარაკები. როცა ჩართულობაზეა ლაპარაკი, სასესიო ფორმატში, ბუნებრივია, ვერ მიიღებენ მონაწილეობას. კონსულტაციების ფორმატი მათთან გახსნილია და ეს პროცესი ჯერ არ დაგვისრულებია. ვაპირებ ეს კითხვა დავსვა - რატომ გავრცელდა ეს განცხადება მაშინ, როდესაც ნამდვილად ჩართულია ეს ხალხი ამ პროცესში? თუ ერთმანეთს არ აწვდიან ინფორმაციას მათი წარმოამდგენლები, ვინც ჩვენთან დადის და გველაპარაკება, არ ვიცი. სრული თანხმობა შესაძლებელია ვერც იყოს მიღწერული თუმცა, ძირითად საკითხებზე რა წუხილებს ქმნიდნენ, ჩვენ ავუხსენით ამ კომპანიებს, ეს არის ხარჯებთან დაკავშირებული".

კომპანია ჯეოსელის განცხადებით, კანონპროექტის ინიცირება ავტორიზებული პირების ჩართულობის და მათი მონაწილეობის გარეშე მიუღებელია.

ჯეოსელისთვის აღნიშნული საკანონმდებლო პაკეტი არსებით გავლენას ახდენს კომპანიის, როგორც ელექტრონული კომუნიკაციების სფეროში ავტორიზებული პირის საქმიანობაზე, ვალდებულებებზე, ფინანსურ და ტექნიკურ შესაძლებლობებზე, მათ შორის, ბიზნესის განვითარების სამომავლო გეგმებზეც.