ლელოს ლიდერის, მამუკა ხაზარაძის განცხადებით, ნიკა მელია არის მხნედ და იზიარებს, რომ ევროკავშირის გირაო უპრეცედენტოა. ამის შესახებ მან რუსთავში ისაუბრა, მას შემდეგ, რაც ენმ-ის თავმჯდომარეს ციხეში შეხვდა

ხაზარაძემ თქვა, რომ მელიასთან ძირითადად ორ საკითხზე ჰქონდა საუბარი: ევროკავშირის გირაოზე და 20 ივნისის საქმეზე საპარლამენტო საგამოძიებო კომისიის შექმნაზე.

"იზიარებს იმას, რომ ევროკავშირის გირაო არის უპრეცედენტო რამ, რომელიც ადასტურებს, რომ ევროკავშირი დამნაშავეების გირაოს არ იხდის. [...] ევროკავშირი გადაწყვეტილებას მიიღებს ისე, რომ ნიკას თავმოყვარეობას არ შეეხოს და იმ პრინციპს, რისთვისაც ის ამდენი ხანია ციხეშია", — თქვა ხაზარაძემ.

რაც შეეხება საგამოძიებო კომისიას, ლელოს ლიდერი ამბობს, რომ ნიკა მელია იდეას პრინციპულად ეთანხმება, თუმცა დეტალურად ამ თემაზე თავად ისაუბრებს.

ენმ-ის თავმჯდომარეს პატიმრობა 20 ივნისის საქმეზე აქვს შეფარდებული და სწორედ ამ საქმეს ეხება ამნისტიის კანონპროექტი. თუმცა საქმე იმაშია, რომ მხარეები ჯერ საბოლოოდ ვერ შეთანხმდნენ, ვის არ უნდა შეეხოს ამნისტია. ცხადია მხოლოდ ის, რომ ადამიანი, ვინც დაზიანებები მიაყენა მაკო გომურს, პასუხისმგებლობისგან არ გათავისუფლდება, ხოლო სხვა საკითხებზე ჯერ პოზიციები საბოლოოდ შეჯერებული არ არის. ამიტომ ოპოზიციამ პარლამენტში კანონპროექტის თავისი ვარიანტი დააინიცირა, ხელისუფლებას კი თავისი ექნება. თავად ნიკა მელია ამბობს, რომ ის ვერ შევა პარლამენტში, სადაც 20 ივნისს ძალადობაში მონაწილე პირებს შეიწყალებენ. ის თანახმაა მისი გირაო ევროკავშირმა გადაიხადოს, თუ ამნისტიის კანონს უკან გაიწვევენ.