პალიტრა ჰოლდინგის შვილობილი კომპანია, მაღაზიათა ქსელი ბიბლუსი ყოფილ და მოქმედ თანამშრომლებს სასამართლოში უჩივის. ინფორმაციას ამავე ჰოლდინგში შემავალი ინტერპრესნიუსი ავრცელებს.

სააგენტოს ცნობით, ბიბლუსი მიიჩნევს, რომ 4 მოქმედ და 2 ყოფილ თანამშრომელმა საქმიანი რეპუტაცია შეულახა და მათ მიერ გავრცელებული ინფორმაციის უარყოფას ითხოვს. სარჩელით ბიბლუსმა საქალაქო სასამართლოს დღეს მიმართა.

"მიმართვაში გავრცელებული იყო სხვადასხვა ცნობები, რამაც კომპანიის საქმიანი რეპუტაციის შელახვა გამოიწვია. სწორედ ამიტომ, კომპანია ბიბლუსი მიმართავს სასამართლოს, რათა დაიცვას თავისი დარღვეული უფლება და დაამტკიცოს, რომ აღნიშნული მიმართვა შეიცავდა არსებითად მცდარ ფაქტებს და იყო ცილისწამება. კომპანიის მოთხოვნაა, მოხდეს გავრცელებული მცდარი ფაქტების უარყოფა ზუსტად იმავე საშუალებებში, სადაც მათი მიმართვა გამოქვეყნდა. თავდაპირველად ეს გავრცელდა აუდიტორია 115-ის ფეისბუქ გვერდის საშუალებით. ამასთან დაკავშირებით, კომპანიის მიერ მომზადებული სარჩელი გადაეცა სასამართლოს", - უთხრა ინტერპრესნიუსს ბიბლუსის იურისტმა ანა სამსონიამ.

15 თებერვალს ბიბლუს გალერის ფილიალიდან გაათავისუფლეს ორი თანამშრომელი, რომელიც ვიდეო მიმართვაში სხვა ოთხ დასაქმებულთან ერთად ფიგურირებდა. მათ მხარდასაჭერად ამავე ფილიალში აუდიტორია 115-იც იმყოფებოდა.

8 თებერვალს, სტუდენტური მოძრაობა აუდიტორია 115-ის ფეისბუქ გვერდზე ბიბლუსი გალერის თანამშრომლების განცხადება გავრცელდა. ვიდეომიმართვაში ისინი არასათანადო სამუშაო პირობებზე და მათი შრომითი უფლებების დარღვევაზე საუბრობენ.