საქართველოს პრეზიდენტმა, გიორგი მარგველაშვილმა საერთო სასამართლოების ორგანულ კანონში ცვლილებებსა და თანმდევ კანონთა პაკეტს ხელი მოაწერა. ამის შესახებ ინფორმაციას პრეზიდენტის ადმინისტრაცია ავრცელებს.

უწყების პრესსამსახურის ინფორმაციით, პრეზიდენტს სურს სასამართლო რეფორმის დანერგვა და ხელი მოაწერა კანონპროექტებს და გამოაქვეყნა.

"პარლამენტმა მხარი არ დაუჭირა სასამართლოს დეცენტრალიზაციას, სასამართლოს მეტ დაცულობას, რაც იყო პრეზიდენტის მოტივირებულ შენიშვნებში და ეყრდნობოდა ვენეციის კომისიის პოზიციას. ეს პრობლემები და ეს საკითხები რჩება, რა თქმა უნდა, მნიშვნელოვნად და ჩვენ ვაგრძელებთ მათზე მუშაობას,"- აღნიშნა პრეზიდენტის საპარლამენტო მდივანმა ანა დოლიძემ.

რამდენიმე დღის წინ, საქართველოს პარლამენტმა დაძლია პრეზიდენტის მოტივირებული შენიშვნები და ცვლილებების პაკეტი პრეზიდენტს ხელის მოსაწერად გადაუგზავნა.

პრეზიდენტმა, გიორგი მარგველაშვილმა კი სასამართლო რეფორმების შესახებ კანონპროექტს ვეტო დაადო და პარლამენტს შენიშვნებით 25 იანვარს დაუბრუნა. პრეზიდენტს მიაჩნდა, რომ ცვლილებების პროექტი ეწინააღმდეგება მიუკერძოებელი სასამართლოს პრინციპებს.

პრეზიდენტს აზრით, ცვლილებების პროექტი სასამართლო რეფორმის პაკეტი ეწინააღმდეგებოდა ინდივიდუალური მოსამართლის დამოუკიდებლობის უზრუნველყოფის პროცესებს. სწორედ, ეს შენიშვნები გახდა მიზეზი, რის გამოც პრეზიდენტმა გადაწყვიტა კონსტიტუციური უფლების გამოყენება და პარლამენტს მოტივირებული შენიშვნებით კანონპროექტი დაუბრუნა.