"როგორ შეიძლება ავამუშავოთ კულტურული დიპლომატია", — ჰკითხა ქართული ოცნების დეპუტატმა, ელისო ბოლქვაძემ პრემიერმინისტრობის კანდიდატს, ირაკლი ღარიბაშვილს პარლამენტში.

"მოგესალმებით ბატონო ირაკლი. არის თუ არა და გაქვთ თუ არა წარმოდგენილი, თუ როგორ შეიძლება ავამუშავოთ კულტურული დიპლომატია შემდეგ ეტაპზე, როცა თქვენ იქნებით პრემიერმინისტრი და გვაქვს თუ არა რესურსები ამისთვის", — სვამს კითხვას ბოლქვაძე.

უმრავლესობის დეპუტატმა ეს კითხვა უკვე მეორედ დასვა პარლამენტში. პირველად იგი ყოფილ პრემიერმინისტრს, გიორგი გახარიას მიემართებოდა. ბოლქვაძეს მაშინაც აინტერესებდა, რა გეგმა ჰქონდა მთავრობას კულტურული დიპლომატიის განვითარებისთვის.

"მოგესალმებით ბატონო გიორგი, განიხილავთ თუ არა, მომავალი 4 წლის განმავლობაში კულტურული დიპლომატიის როლს ქვეყნის განვითარებაში და თუ არსებობს მთავრობის გეგმა, ან თუ გეგმავთ ამ მიმართულებით მუშაობას", — თქვა მან.

დღეს პარლამენტი ახალ მინისტრთა კაბინეტს და პრემიერმინისტრობის კანდიდატს, ირაკლი ღარიბაშვილს ოფიციალურად დაამტკიცებს. ღარიბაშვილმა 19 თებერვალს ორი ახალი მინისტრი წარადგინა. თავდაცვის მინისტრის პოსტს ჯუანშერ ბურჭულაძე დაიკავებს, ხოლო რეგიონული განვითარების და ინფრასტრუქტურის მინისტრის თანამდებობაზე მაია ცქიტიშვილს მისი მოადგილე, ირაკლი ქარსელაძე შეცვლის.

ნიკა მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

იმავე დღეს ქართულმა ოცნებამ პრემიერმინისტრობის კანდიდატად ირაკლი ღარიბაშვილი დაასახელა. იმ შემთხვევაში, თუ პარლამენტი მთავრობის ახალ შემადგენლობას დაამტკიცებს, ღარიბაშვილი პრემიერმინისტრი მეორედ გახდება.