გასულ თვეში ველური ბუნების 24 წლის ფოტოგრაფმა, ანურაგ გავანდემ უიშვიათესი და უმშვენიერესი შავი ლეოპარდი (ჯიქი) გადაიღო. ფოტოგრაფის სიტყვებით, ცხოველი მისგან 9 მეტრში მოულოდნელად, გზაზე გადასვლის დროს დაინახა.

"უცნაური იყო, ვეფხვის დანახვას და მის გადაღებას ველოდით და უეცრად, შავი ლეოპარდი დავინახეთ", — თქვა მან.

ის ამტკიცებს, რომ ეს ერთადერთი შავი ლეოპარდია ადგილობრივ პარკში და როგორც მისი ინსტაგრამის პოსტიდან ვიგებთ, ცხოველთან შეხვედრისას არც თუ ისე მშვიდად იყო.

"ჩახედე თვალებში და იგრძნობ შიშის მნიშვნელობას", — დაწერა მან.

"ჩვენი შეხვედრა სულ რაღაც 1 წუთს გაგრძელდა, მაგრამ ეს ჩემი ცხოვრების ყველაზე საინტერესო და ამაღელვებელი წამები იყო".

ფოტო: Anurag Gawande

ფოტოგრაფი თანმხლებ ადამიანებთან ერთად პარკის გზაზე მანქანით იმყოფებოდა. მისი სიტყვებით მაშინვე შეჩერდნენ და დისტანცია არ დაარღვიეს, რომ მბრწყინავბეწვიან ცხოველს გზა მშვიდად გაეგრძელებინა.