23 წლის ტორონტოელმა სტუდენტმა, კემარ გერი ლეილორმა, სავარაუდოდ, კორონავირუსის გამო დაკარგული გემო მეტად უჩვეულო მეთოდით დაიბრუნა.

მიუხედავად იმისა, რომ ლეილორს კორონავირუსზე ტესტი არ ჩაუტარებია, მისი თქმით, მან და დედამისმა დაავადება გადაიტანეს და ყნოსვა და გემოს შეგრძნებაც მის გამო დაკარგეს. სტუდენტის დედამ, ტრუდი-ენ ლეილორმა, შვილს უთხრა, რომ განკურნებიდან რამდენიმე დღეში ორივე მათგანი იმ უჩვეულო საშუალებით დაიბრუნა, რომელიც ბავშვობაში დედამ ასწავლა იამაიკაზე.

როგორც აღმოჩნდა, ტრუდი-ენის დედა ფორთოხალს ცეცხლზე იმგვარად ამზადებდა, რომ მისი კანი მთლიანად გაშავებულიყო. დაბრაწული ციტრუსის გაფრცქვნის შემდეგ კი გამომცხვარ შიგთავსს ყავისფერ შაქართან ურევდა და ისე აჭმევდა შვილს.

ლეილორმა ეს საეჭვო მეთოდი თავადაც სცადა, თუმცა, მისი თქმით, ამან გაამართლა. სტუდენტმა იფიქრა, რომ რეცეპტი, შესაძლოა, სხვებსაც დახმარებოდა, ამიტომ ტიკტოკზე მისი მომზადების პროცესი გადაიღო და ხალხს გაუზიარა.

@toosmxll

How to get taste buds back!!! ##howto ##tastebud ##lifehacks ##health ##fyp ##remedy 

♬ Steven Universe - L.Dre

როგორც აღმოჩნდა, გამომცხვარი ფორთოხალი ბევრს დაეხმარა; ზოგს მაშინვე, ზოგსაც — ცოტა მოგვიანებით, როცა განმეორებით მოამზადეს და მიირთვეს.

მეთოდის გამოყენება ტიკტოკის სხვა მომხმარებლებმა, მათ შორის, ექიმებმაც სცადეს. ბრიტანელი ქირურგი, კარან რაჯანი, რომელმაც თავად მოამზადა ფორთოხალი ლეილორების რეცეპტით, ამბობს, რომ ეს მეთოდი, შესაძლოა, ზოგზე მოქმედებდეს, სხვებზე კი — არა.

მეთოდი შეგრძნებებზე ერთგვარი ფიზიოთერაპიასავით მოქმედებს, რასაც "ყნოსვით ვარჯიშს" უწოდებენ. რაჯანი ამბობს, რომ მედიცინაში ასეთ გზას წინათ იყენებდნენ კორონავირუსის მსგავსი დაავადებების მკურნალობისას ორგანიზმის დაზიანებული ფუნქციების აღსადგენად.

ექიმების ნაწილი ამ მეთოდის ეფექტურობისადმი სკეპტიკურადაა განწყობილი, თუმცა, რაჯანის თქმით, "ჩვენ ყველას განსხვავებული ფიზიოლოგია გვაქვს", ამიტომ მედიცინაში არ არსებობს მეთოდი, რომელიც ყველა შემთხვევაში ამართლებს.

პენსილვანიის უნივერსიტეტის რინოლოგიის პროფესორის, ექიმ ჯეიმს პალმერის თქმით, ლეილორების მეთოდი ცდად მაინც ღირს, თუმცა, თუკი არ ამართლებს, სჯობს, შეეშვათ.