თოვლის გამო დანგრეული სახლი სოფელ ფერიაში. ხელვაჩაური, 1 თებერვალი, 2017.

ფოტო: პირველი არხი

დიდთოვლობის შედეგად ხელვაჩაურის მუნიციპალიტეტში, სოფელ ზედა განთიადში თამაზ გორგაძის საცხოვრებელი სახლი დიდთოვლობის გამო დაინგრა. ინფორმაციას ამის შესახებ აჭარის მთავრობის პრესსამსახური ავრცელებს. აღნიშნული მიზეზით სახლი ასევე დაინგრა 1 თებერვალს, ხელვაჩაურის რაიონის სოფელ ფერიაში, რა დროსაც ერთი ადამიანი დაიღუპა.

ნანგრევებიდან უკვე ამოყვანილია ხუთსულიანი ოჯახის სამი წევრი. მათი ჯანმრთელობის მდგომარეობა დამაკმაყოფილებელია. გადარჩენილებს შორისაა ორსული ქალი, რომელიც სასწრაფო დახმარების ბრიგადამ დედათა და ჩვილ ბავშვთა სახლში გადაიყვანა. ექიმების მეთვალყურეობის ქვეშ იმყოფებიან ოჯახის სხვა წევრებიც. ოჯახის ერთ-ერთი წევრი, თამაზ გორგაძე გარდაცვლილი იპოვეს. აჭარის მთავრობის ცნობით, ამ წუთებში მიმდინარეობს მისი შვილის, 21 წლის ლადო გორგაძის სამაშველო ოპერაცია, რომელიც ბეტონის მასის ქვეშაა მოყოლილი.

ადგილზე იმყოფებიან ხელვაჩაურის მუნიციპალიტეტის გამგებელი ნადიმ ვარშანიძე, გამგეობისა და საკრებულოს თანამშრომლები. ასევე სასწრაფო და სამაშველო სამსახურების ბრიგადები და აჭარის გზებისა და სამელიორაციო სისტემების მართვის დეპარტამენტის თანამშრომლები.
შინაგან საქმეთა სამინისტროს განცხადებით, მიმდინარეობს გამოძიება ნგრევის მიზეზების გამოსაკვლევად.

ხელვაჩაურის გამგებელი ნადიმ ვარშანიძე მოსახლეობას სიფრთხილისკენ მოუწოდებს და აცხადებს, მუნიციპალიტეტში, თოვლის გამო სახლების ნგრევის უკვე მეორე შემთხვევა დაფიქსირდა ბოლო ორი დღის განმავლობაში, რის გამოც უკვე ორი ადამიანი გარდაიცვალა. გამგებელი მოსახლეობას მოუწოდებს, თოვლისგან გაწმინდონ საკუთარი საცხოვრებლის სახურავები, რათა მსგავსი ტრაგედიები თავიდან აიცილონ.