პრეზიდენტმა დონალდ ტრამპმა უზენაესი სასამართლოს მოსამართლის ვაკანტურ პოზიციაზე ფედერალური სააპელაციო სასამართლოს კონსერვატორი მოსამართლე, ნილ გორსაჩი წარადგინა. ტრამპის ამ გადაწყვეტილებას სიხარულით შეხვდნენ როგორც რესპუბლიკელები, ისე, ამერიკული კონსერვატორული ჯგუფები.

FOX news-ის ცნობით, კონგრესის წარმომადგენელთა პალატის პრესსპიკერმა, პოლ რაიანმა თქვა, რომ "ტრამპმა აასრულა თავისი საარჩევნო დაპირება და მოსამართლის ვაკანტურ პოსტზე წარადგინა კანდიდატი, რომელიც არის კონსტიტუციის ერთგული და რომელსაც აქვს მყარი ერთგულება სიცოცხლის მიმართ (ე.წ. pro-life)".

რესპუბლიკელებისგან განსხვავებით, დემოკრატიულმა პარტიამ განაცხადა, რომ არსებობს კითხვები, რამდენად ესმის ნილ გორსაჩს კონსტიტუციის იდეის, რომლის მიხედვითაც, ის თანაბრად იცავს ყველას და არა მხოლოდ მდიდრებს.

დემოკრატიული პარტიის მიერ გორსაჩთან დაკავშირებით გავრცელებულ განცხადებაში წერია, რომ ის სტუდენტობიდან ულტა-მემარჯვენე იდეოლოგიის იყოს და მისი სტატიები კრიტიკის ობიექტს წარმოადგენდნენ ლიბერალური მოძრაობები. გარდა ამისა, გორსაჩი, კერძო იურიდიული პრაქტიკისას, მუდმივად იცავდა კორპორაციების ინტერესებს დასაქმებულთა წინააღმდეგ და მოსამართლის პოზიციიდანაც მუდმივად კორპორაციების სასარგებლო პოზიციას იკავებდა.

უზენაესი სასამართლო აშშ-ში ერთ-ერთი ყველაზე მნიშვნელოვანი სტრუქტურაა, რომლის გადაწყვეტილებებსაც აქვს ისტორიული მნიშვნელობა. ის 9 მოსამართლისგან შედგება, რომლებიც თანამდებობას სიცოცხლის ბოლომდე ინარჩუნებენ. უზენაესი სასამართლოს ერთ-ერთი მოსამართლე, კონსერვატორი ანტონ სკალია, რომელიც 1986 წელს რონალდ რეიგანის წარდგენით დაინიშნა, 2016 წლის თებერვალში, ძილში გარდაიცვალა. შედეგად, უზენაეს სასამართლოში დარჩა ოთხი ლიბერალური და ოთხიც კონსერვატიული შეხედულებების მოსამართლე. სწორედ ამიტომ, ამერიკისთვის გადამწყვეტად მნიშვნელოვანი იყო, თუ როგორ შეიცვლებოდა ძალთა ბალანსი უზენაეს სასამართლოში. მიუხედავად იმისა, რომ ბარაკ ობამამ ვაკანტურ პოსტზე წარადგინა მოსამართლე მერიკ გარლანდი, მისი კანდიდატურა სენატმა განუხილველად დატოვა. აშშ-ს პოლიტიკური წრეები მიიჩნევდნენ, რომ რადგან ბარაკ ობამას პრეზიდენტობის ვადა 2016 წელს სრულდებოდა, მის მიერ დასახელებულ პირს არ უნდა დაეკავებინა უზენაესი სასამართლოს მოსამართლის პოზიცია.