აშშ-ს პრეზიდენტის ინაუგურაციის შემდეგ, დონალდ ტრამპსა და რუსეთის პრეზიდენტ ვლადიმერ პუტინს შორის პირველი სატელეფონო საუბარი შედგა.

კრემლი სატელეფონო საუბრის შინაარსს აქვეყნებს და წერს, რომ ორივე მხარემ გამოთქვა მზაობა, საერთო ძალისხმევით დაასტაბილურონ და განავითარონ აშშ-რუსეთის თანამშრომლობა.

კრემლის ინფორმაციით, პუტინმა და ტრამპმა დეტალურად განიხილეს საერთაშორისო საკითხები, მათ შორის, ტერორიზმის წინააღმდეგ ბრძოლა, სიტუაცია ახლო აღმოსავლეთში, არაბეთ-ისრაელის კონფლიქტი, სტრატეგიული სტაბილურობა, ირანის ბირთვული პროგრამა და კორეის ნახევარკუნძულის საკითხი.

როგორც კრემლის განცხადებაში წერია, მათი დისკუსია შეეხო უკრაინის კრიზისის მთავარ ასპექტებსაც.

კრემლის ცნობით, აშშ-სა და რუსეთის ლიდერებმა ხაზგასმით აღნიშნეს, რომ საერთაშორისო ტერორიზმის წინააღმდეგ საბრძოლველად, მათი ერთობლივი ძალისხმევა, პრიორიტეტებს შორის პირველია და შეთანხმდნენ, რომ ISIS-სა და სხვა ტერორისტული დაჯგუფებების წინააღმდეგ, რეალურ სამოქმედო გეგმას ჩამოაყალიბებენ.

კრემლი წერს, რომ დონალდ ტრამპმა და ვლადიმერ პუტინმა, აშშ-სა და რუსეთს შორის, სავაჭრო და ეკონომიკური კავშირების აღდგენაზეც იმსჯელეს.

ტრამპი და პუტინი შეთანხმდნენ, რომ მათი შეხვედრის სავარაუდო ადგილისა და დროს დათქვამდნენ.