საქართველოს მთავრობის მიერ დამტკიცებული 2017-2018 წლის კიბერუსაფრთხოების ეროვნული სტრატეგიის მიხედვით, ქვეყნისთვის მთავარი საფრთხე რუსეთის ფედერაციის მიერ ორგანიზებული კიბერშეტევები და კიბერსაშუალებებით ჩადენილი დანაშუალებია.

„რუსეთის ფედერაცია იყენებს კიბერსაშუალებებს ევროატლანტიკური სივრცის წინააღმდეგ წარმოებულ საინფორმაციო ომში და შესაბამისად, კიბერსივრცის მეშვეობით რუსეთის ფედერაცია აქტიურად ეწევა საინფორმაციო კამპანიას, რომლიც მიზნად ისახავს საქართველოს ევროატლანტიკურ ოჯახში ინტეგრაციის შეფერხებას და ასევე, საქარართველოს მოსახლეობაში ევროატლანტიკური ღირებულებების დისკრედიტაციას,“ - აღნიშნულია დადგენილებაში.

ამავე სტრატეგიის მიხედვით, 2008 წლის შემდეგ რუსეთიდან მომავალი კიბერსაფრთხეები გაზრდილია. მთავრობას მიაჩნია, რომ:

  • რუსეთის ფედერაციას არ შეუცვლია აგრესიული პოლიტიკა კიბერდომეინში;
  • რუსეთის ფედერაციამ უკანასკნელ წლებში მნიშვნელოვნად აამაღლა საკუთარი კიბერშეტევითი შესაძლებლობები;
  • რუსეთის ფედერაციამ მნიშვნელოვნად დახვეწა კიბერსაშუალებების გამოყენების სპეციფიკა მის მიერვე წარმოებულ ფსიქოლოგიური გავლენის ოპერაციებში;
  • 2008 წელთან შედარებით, მნიშვნელოვნად არის გაზრდილი საქართველოს დამოკიდებულება ინფორმაციულ და საკომუნიკაციო ტექნოლოგიებზე, რაც პოტენციური კიბერთავდასხმების შემთხვევაში, თავის მხრივ, ზრდის მოსალოდნელი ზიანის მასშტაბებს.

დოკუმენტის მიხედვით, რუსეთის ფედერაცია რეგულარულად ახორციელებს კიბერსადაზვერვო საქმიანობას საქართველოში სახელმწიფო საიდუმლოების შემცველი და სხვა სახის დახურული ინფორმაციის მოპოვების მიზნით. სტრატეგიაში მოყვანილია ერთ-ერთი მსგავსი შემთხვევის შესახებ. კერძოდ, 2011 წელს გამოვლინდა კიბერსადაზვერვო ოპერაცია – GEORBOT, რომელიც სამხედრო სფეროსა და საქართველოს ხელისუფლებასა და ნატო-ს შორის არსებული ურთიერთობების თაობაზე ინფორმაციის მოპოვებას ისახავდა მიზნად.

„სადაზვერვო ოპერაციის მთავარ სამიზნე ობიექტებს წარმოადგენდნენ საქართველოს მაღალი თანამდებობის პირების სამსახურებრივი გამოყენების ელექტრონული რესურსები, სადაც დისტანციურად განხორციელდა ჯაშუშური პროგრამული უზრუნველყოფის საშუალებათა ინსტალაცია, რომლის მეშვეობითაც მუდმივად ხორციელდებოდა სხვადასხვა კატეგორიის ინფორმაციის გადინება,“ – განმარტებულია საქართველოს მთავრობის მიერ დამტკიცებულ კიბერუსაფრთხოების 2017-1018 წლების სტრატეგიაში.