ამერიკის შეერთებული შტატების პრეზიდენტმა ინაუგურაციის შემდეგ უკვე მიიღო რამდენიმე მნიშვნელოვანი გადაწყვეტილება. ტრამპის პრესმდივანმა შონ სპაისერმა მედიას აცნობა, რომ პრეზიდენტმა პატრიოტიზმის დღის დაწესების გადაწყვეტილება მიიღო. ამის შესახებ Reuters წერს.

ტრამპმა ასევე მოაწერა ხელი დოკუმენტს, რომლის საფუძველზე უნდა შეიცვალოს ობამას მიერ შემუშავებული აქტი ხელმისაწვდომი ჯანდაცვის შესახებ (ე.წ. ობამაქეარი).

ერთ–ერთი ყველაზე მნიშვნელოვანი გადაწყევტილება, რაც დონალდ ტრამპმა ინაუგურაციიდან რამდენიმე საათში მიიღო, თავდაცვის მდივნის პოსტზე გენერალ ჯეიმს მატისის დანიშვნაა.

კანონის თანახმად, პენტაგონის ხელმძღვანელობა მხოლოდ სამოქალაქო პირებს ან სამხედრო წოდების მქონე იმ ადამიანებს შეუძლიათ, ვინც სამხედრო სამსახური 7 წლის წინ დატოვა. მატისმა სამხედრო სისტემა მხოლოდ სამი წლის წინ დატოვა. ამ შეზღუდვის მოსახსნელად მას კონგრესის ავტორიზაცია სჭირდებოდა. ტრამპის ახალმა ადმინისტრაციამ შეძლო ყველა ამ პროცედურის გავლა საკანონმდებლო შეზღუდვის დასაძლევად და ახალმა პრეზიდენტმა უკვე მოაწერა ხელი მატისის თვადაცვის მდივნის პოსტზე დანიშვნას.

ამერიკის ახალი პრეზიდენტის, დონალდ ტრამპის ინაუგურაციის შემდეგ, თეთრი სახლის ვებგვერდზე - whitehouse.gov ლგბტ თემის უფლებების შესახებ ინფორმაცია წაშლილია. ამის შესახებ thedailybeast.com წერს.

გამოცემის ინფორმაციით, ვებგვერდზე ასევე წაშლილია სამოქალაქო უფლებებისა და კლიმატის ცვლილებების შესახებ ინფორმაცია. ვებგვერდზე კლიმატის ცვლილებების განყოფილება შეიცვალა "ამერიკის პირველი ენერგეტიკის გეგმით", რომელიც უგულებელყოფს კლიმატის ცვლილებების მიმართ აქამდე არსებულ ხედვას.