ქუთათელ-გაენათელი მიტროპოლიტის, იოანეს განცხადებით, მმართველ გუნდს გამარჯვება ყველამ უნდა მივულოცოთ. ასე უპასუხა მან ჟურნალისტების კითხვას, მიულოცა თუ არა ქართულ ოცნებას არჩევნებში გამარჯვება.

"გამარჯვება ყველამ უნდა მივულოცოთ, რათა ქვეყანაში იყოს მშვიდობა. გაიმარჯვა, ხალხის ხმა არის? მივულოცოთ. არამარტო ჩვენთან, ამერიკაშიც ეგრე არის, გაიმარჯვა პრეზიდენტმა, ვულოცავთ. მართალია ტრამპი არ ეთანხმება, მაგრამ დაამტკიცოს, რომ გაყალბებას ჰქონდა ადგილი", — განუცხადა მან ჟურნალისტებს.

მეუფე იოანე ცნობილია ხელისუფლების მხარდამჭერი განცხადებებით, ისევე, როგორც პრორუსული რიტორიკით. ის ორჯერ დაესწრო ქართული ოცნების პარტიულ ყრილობას, ჯერ ბაგრატის ტაძრის ეზოში, შემდეგ კი წყალტუბოში.

"ჩვენ შევხვდით ხელისუფლებას. პატივი უნდა მივაგოთ პრემიერს, დედაქალაქის მერს. ეკლესია ყოველთვის პატივს მიაგებს ხელისუფლებას, ეს პირველი საუკუნიდან გადმოცემული სიტყვებია, თუმცა მაშინ წარმართი მეფეები იყვნენ, რომ ის ვალდებულია დაიცვას, მშვიდობა, ერთობა, სამართალი. ჩვენ ამას მივესალმებით", — ამბობდა მიტროპოლიტი.

ოპოზიცია არჩევნების პირველი ტურის შედეგებს ლეგიტიმურად არ აღიარებს და მეორე ტურს ბოიკოტი გამოუცხადა. ცესკოს წინასწარი მონაცემებით, ოპოზიციის გარეშე მიმდინარე მეორე ტურში ქართულმა ოცნებამ გაიმარჯვა.