National Geographic-ის თანამშრომლებმა მკითხველებისთვის ის "25 საოცარი ადგილი" შეარჩიეს, რომელიც 2021 წელს შეახსენებდათ, რატომ უყვარდათ მოგზაურობა ასე ძლიერ. რუდუნებით შერჩეულ სიაში საქართველოს ულამაზესი მხარე, სვანეთიც მოხვდა.

"თოვლით დაფარული მწვერვალებით გარშემორტყმულ სვანეთში საქართველოს ყველაზე იზოლირებული სოფლები მდებარეობს. აქ არსებული კოშკების დიდი ნაწილი შუა საუკუნეებში აიგო, მოსახლეობა რომ მტრისგან დაეცვათ", — წერია სტატიაში.

ჟურნალი წერს, რომ სვანეთი, შესაძლოა, ცივი და მიუწვდომელი მხარე ჩანდეს, თუმცა იქ ტურისტებს თბილად ხვდებიან. გამოცემა აქცენტს აკეთებს უშგულზეც, რომელიც, ბოჭორნასთან ერთად, ევროპის ყველაზე მაღალი სოფლის ტიტულს ატარებს. სვანეთის ეს ორი სოფელი ზღვის დონიდან 2 345 და 2 160 მეტრ სიმაღლეზე მდებარეობს. ორივე რეგიონში ზაფხული მოკლეა, ზამთარი კი ქარიანი და თოვლიანი. სოფლები იმითაც გამოირჩევა, რომ მოსახლეობა მათ არ ტოვებს.

უშგული

ფოტო: CamelKW / Flickr

"იზოლირებულობის გამო, სვანური კულტურა საუკუნეების განმავლობაში საქართველოს დანარჩენი რეგიონებისგან დამოუკიდებლად ვითარდებოდა. აქ შემორჩენილია არამხოლოდ უნიკალური ენა, ასევე უძველესი ტრადიციებიც, როგორიცაა წვერის მოჭრის რიტუალი და სისხლის აღება. სვანეთი, რომელსაც ოდესღაც გამეფებული უკანონობის გამო უფრთხოდნენ, დღეს სტუმართმოყვარეობითაა ცნობილი", — წერს National Geographic.

გამოცემა მკითხველს სვანეთის გვერდით ისეთ ადგილებს ურჩევს, როგორიცაა ფლორიდა, მიჩიგანი, კანადა, ინგლისი, უნგრეთი, იტალია, გერმანია, დანია და ა.შ.