ხულოს მუნიციპალიტეტის სოფელ წაბლანას მაცხოვრებლები პროტესტის ნიშნად არჩევნებში მონაწილეობაზე უარს აცხადებენ. ამის შესახებ ინფორმაცია პირველად გამოცემამ ბათუმელები გაავრცელა.

სოფელ წაბლანას მოსახლეობამ ჯერ კიდევ სექტემბრის დასაწყისში დააანონსა, რომ თუ ხელისუფლება მათ მოთხოვნებს არ დააკმაყოფილებდა, ისინი პროტესტის ამ ფორმას მიმართავდნენ: ადგილობრივი ეკომიგრანტები მოითხოვენ, ბათუმში მათთვის გადაცემული ბინები გარემონტდეს, რადგან თავად ამისთვის საჭირო სახსრები არ გააჩნიათ.

აჭარის საზოგადოებრივი მაუწყებლის ინფორმაციით, დღეს, 31 ოქტომბერს სოფლის მოსახლეობა საარჩევნო უბანთან შეიკრიბა, თუმცა მათ საკუთარი არჩევანი არ დაუფიქსირებიათ. მეტიც — პროტესტს საარჩევნო უბნის დამკვირვებლებიც შეუერთდნენ, რის გამოც ცესკოს მოუწია ისინი სხვა თანამშრომლებით ჩაენაცვლებინა.

სოფელ წაბლანაში სულ 658 ამომრჩეველია რეგისტრირებული. საერთო კრებაზე სოფლის მოსახლეობა ერთსულოვან შეთანხმებამდე მივიდა, რომ არჩევნებისთვის ბოიკოტი გამოეცხადებინათ.

სოფელ წაბლანაში მეწყრით დაზარალებული ეკომიგრანტი ოჯახები ცხოვრობენ, რომლებიც უკვე წლებია უსაფრთხო საცხოვრებლით უზრუნველყოფას უშედეგოდ ითხოვენ.

2020 წლის საპარლამენტო არჩევნების შესახებ

დღეს 31 ოქტომბერს, საქართველოს პარლამენტის არჩევნები იმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ტარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია, ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია

მთელი ქვეყნის მასშტაბით საარჩევნო უბნები 8 საათზე გაიხსნა და ხმის მიცემის პროცესი დაიწყო. უბნები დღეს 20:00 საათზე დაიხურება.

ისტორიაში პირველად, არჩევნები პროპორციულთან მიახლოებული, 120/30-ზე სისტემით გაიმართება.

გაიგეთ მეტი არჩევნებზე: