პაკისტანის პრემიერმინისტრი, იმრან ხანი ფეისბუქის გენერალურ დირექტორს, მარკ ცუკერბერგს მიმართავს, რომ სოციალურ ქსელში ისლამოფობიური კონტენტი დაიბლოკოს.

ცუკერბერგისადმის გაგზავნილ წერილში ხანი ამბობს, რომ მზარდი ისლამოფობია ახალისებს სიძულვილს, ექსტრემიზმსა და ძალადობას განსაკუთრებით სოციალური ქსელების გამოყენებით.

გარდა ამისა, ტვიტერზე გამოქვეყნებულ წერილში პაკისტანის პრემიერი ეთანხმება ფეისბუქის ახალ პოლიტიკას, რომლის თანახმადაც ჰოლოკოსტის უარმყოფი ან დამამახინჯებელი კონტენტი წაიშლება. მან ითხოვა, რომ მსგავსი პოლიტიკა ისლამოფობიურ პოსტებზეც გავრცელდეს.

წინა დღეს, 25 ოქტომბერს პაკისტანის პრემიერმა საფრანგეთის პრეზიდენტი, ემანუელ მაკრონი ისლამზე თავდასხმაში დაადანაშაულა. მისი შეფასებები მაკრონის განცხადებას მოჰყვა.

საფრანგეთში ისტორიის მასწავლებლის მკვლელობის გამო ემანუელ მაკრონმა განაცხადა, რომ "ისლამისტებს ჩვენი მომავალი უნდათ".

"სამწუხაროა, რომ [მაკრონმა] ისლამზე და არა ტერორისტებზე თავდასხმით გადაწყვიტა ისლამოფობიის წახალისება", — განაცხადა პაკისტანის ლიდერმა.

ეს პირველი შემთხვევა არაა, როცა პაკისტანის ხელისუფლება ფეისბუქს მიმართავს. 2017 წელს პრემიერმინისტრი იმრნა ხანის წინამორბედმა, ნავაზ შარიფმა სოციალური ქსელების გიგანტს მოუწოდა, "ღვთისმგმობი კონტენტი" შეისწავლოს — თუმცა რა იგულისხმებოდა ამაშ უცნობია.