მმართველი გუნდის ლიდერები ბოლო რამდენიმე დღეა აქტიურად არიან ჩართული საარჩევნო კამპანიაში და სხვადასხვა რეგიონში მაჟორიტარი დეპუტატობის კანდიდატებს წარადგენენ. ღონისძიებებზე უმეტესად სიტყვით ქართული ოცნების გენერალური მდივანი კახა კალაძე და პრემიერმინისტრი გიორგი გახარია გამოდიან.

ერთი შეხედვით, გახარია და კალაძე განსხვავებულ მესიჯბოქსებს აჟღერებენ. მაგალითად, გახარია ამტკიცებს, რომ მათი პარტია წარსულზე ორიენტირებული არ არის და მხოლოდ მომავალზე უნდა ილაპარაკონ, მაშინ, როცა კალაძე აქტიურად საუბრობს იმაზე, როგორ დაამარცხეს მათ 8 წლის წინ ნაციონალური მოძრაობა. შესაძლოა, გაჩნდეს ეჭვი, რომ პარტია საერთო მესიჯბოქსზე ვერ შეთახნმდა, თუმცა ამ ეჭვს ფანტავს ის ფაქტი, რომ გახარიაც და კალაძეც ერთსა და იმავე ადგილებში, ერთი და იმავე ტრიბუნიდან, სულ რამდენიმე წუთის სხვაობით საუბრობენ. ჯერ კალაძე აკრიტიკებს წარსულს და აქებს აწმყოს, შემდეგ კი გახარია საუბრობს მომავლის მნიშვნელობაზე.

საილუსტრაციოდ ბოლო ორი დღის განმავლობაში აჭარის რეგიონში, კერძოდ, შუახევში, ხულოსა და ქედაში მათი გამოსვლები შეგვიძლია გამოვიყენოთ.

მაგალითად, შუახევში კალაძემ ხაზი გაუსვა, რომ მათი ხელისუფლებაში მოსვლა ნიშნავდა ქვეყანაში ტერორის დასრულებას.

კალაძე შუახევში: "ქართული ოცნების ხელისუფლებაში მოსვლა ნიშნავდა ქვეყანაში ძალადობისა და ტერორის დასრულებას, თავისუფლებისა და ადამიანის უფლებებზე დაფუძნებული, დემოკრატიული და სამართლებრივი სახელმწიფოს მშენებლობას, სადაც უპირველესი პრიორიტეტი ადამიანი და მასზე ზრუნვაა. ჩვენმა გუნდმა სახელმწიფო რეალურად ხალხის სამსახურში ჩააყენა და ყველა მიმართულებით გააუმჯობესა ვითარება".

გახარიამ კი იმავე ტრიბუნიდან გააჟღერა, რომ მათ წარსული არ აინტერესებთ.

გახარია შუახევში: "ჩვენ მომავალზე უნდა ვილაპარაკოთ. ჩვენ არ გვაინტერესებს წარსული. გვაინტერესებს მომავალი, გასაკეთებელი საქმე და რა თქმა უნდა, ჩვენი ბავშვების, ჩვენი შვილების მომავალი. შუახევი ისტორიული ძეგლებით ერთ-ერთი გამორჩეული კუთხეა, სადაც ბევრი რამ გაკეთდა. [...]

ყველა სასოფლო-სამეურნეო პროდუქტი, რომელიც ამ ქვეყანაში და აჭარაში მოდის, ამ პროდუქტის გადამუშავებაში, სახელმწიფო, გლეხს მიეხმარება. ყველამ ერთად უნდა ვიშრომოთ და რაც მთავარია, ყველას ერთად უნდა გვესმოდეს, რომ გასაყოფი არაფერი გვაქვს. ამ ლამაზ კუთხეს და ლამაზ ქვეყანას, ყველამ ერთად უნდა მოვუაროთ. მაშინ ვიქნებით წარმატებული ხალხი და მაშინ გვეთქმის ჩვენი მომავლისთვის, რომ ვიშრომეთ იმისთვის, რათა კეთილსინდისიერად, კეთილი და წარმატებული მომავალი დაგვეტოვებინა ჩვენი შვილებისთვის. ეს არის ჩვენი მიზანი. ჩვენ არავისთან ბრძოლა და ომი არ გჭირდება".

ხულოში სიტყვით გამოსვლისას კალაძემ ხაზგასმით აღნიშნა, რომ 2012 წლის შემდეგ ქვეყანაში ფუმდამენტური ცვლილებები განხორციელდა. პრემიერისგან განსხვავებით, მომავალზე საუბრის ნაცვლად, მან გაკეთებული საქმეები ჩამოთვალა და "მოგვიანებით" სასაუბრო თემად გადადო მაჟორიტარი დეპუტატების წარდგენა, რისთვისაც იყო ხულოში ჩასული.

კალაძე ხულოში: "დარწმუნებული ვარ, შეუიარაღებელი თვალითაც მარტივად შესამჩნევია, რომ 2012 წლის შემდეგ ჩვენს ქვეყანაში, ყველა მიმართულებით მოხდა ფუნდამენტური ცვლილებები. თამამად შეიძლება ითქვას, რომ კონკრეტულად ხულოში, ჩვენი ხელისუფლების პირობებში სასოფლო სამეურნეო და ტურისტული მიმართულებით ძალიან მნიშვნელოვანი პროექტები განხორციელდა, რაშიც მოსახლეობაც აქტიურად ჩაერთო, გარდა ამისა, ჩვენი ხელისუფლების პირობებში აქ, ამ მუნიციპალიტეტში აქამდე არნახული რაოდენობისა და მასშტაბების ინფრასტრუქტურული პროექტები განხორციელდა. [...]

დღეს, ჩვენი შეკრების მიზეზი და მიზანი ყველამ ძალიან კარგად იცით, რომ გვინდა წარმოგიდგინოთ ორი ადამიანი, თუმცა ამაზე მოგვიანებით. მე დარწმუნებული ვარ იმაში, რომ ამ ადამიანებს ექნებათ თქვენი მხარდაჭერა და თანადგომა".

პრემიერმა კი ისევ გაუსვა ხაზი, რომ აუცილებელია საუბარი მომავალზე.

გახარია ხულოში: "მოგესალმებით აჭარის და საქართველოს ულამაზეს კუთხეში, ხულოში. პატივია, აქ, თქვენთან ყოფნა და საუბარი, რა თქმა უნდა, პირველ რიგში, მომავალზე, მაგრამ, სანამ ამ საუბარზე გადავალთ, ყველა უნდა შევთანხმდეთ, რომ ეს კუთხე ქვეყნისთვის ყოველთვის იყო სამაგალითო".

"გარდამავალი როლი" ითამაშა აჭარის მთავრობის თავმჯდომარემ, თორნიკე რიჟვაძემ, რომელმაც კალაძის და გახარიას სიტყვა ერთგვარად გააერთიანა და შეაჯამა: წარსულზეც ისაუბრა და მომავალზეც.

რიჟვაძე ხულოში: "კიდევ ერთხელ მინდა გესაუბროთ ჩვენს სამომავლო გეგმებზე, ჩვენს განვითარების პერსპექტივებზე, რომელიც პირველ რიგში უნდა შეეხოს მაღალმთიან აჭარას და ხულოს. ეს პროგრესი მართლაც ხელშესახებია.

დარწმუნებული ვარ, როგორც დღეს, ისე მომავალშიც, თითოეული ხულოელი იგრძნობს იმ განვითარებას, იმ სამართლიან პერსპექტიულ ქვეყანას, რომელსაც საფუძველი ჩაეყარა 2012 წელს ბატონი ბიძინა ივანიშვილის ლიდერობით".

იგივე ხდებოდა ქედაშიც, სადაც კალაძემ იმაზე ისაუბრა, თუ წინა ხელისუფლებისგან განსხვავებით, რა გაუკეთეს მათ რეგიონს.

კალაძე ქედაში: "ალბათ ყველანი დამეთანხმებით, რომ ქართული ოცნების ხელისუფლებაში მოსვლის დღიდან, წინა ხელისუფლებისგან განსხვავებით, ქედის მუნიციპალიტეტში, ისევე, როგორც, მთლიანად მაღალმთიან აჭარაში მცხოვრები ადამიანების მიმართ დამოკიდებულება ფუნდამენტურად შეიცვალა, რა თქმა უნდა, უკეთესობისკენ. დღეს, ისე, როგორც არასდროს, ხელისუფლებისგან განსაკუთრებული ყურადღება გექცევათ".

გახარიამ კი თავისი სიტყვა ისევ სამომავლო გეგმებს დაუთმო.

გახარია ქედაში: "ბევრი ისეთი რამ არის გასაკეთებელი, რაც ჯერ კიდევ აღელვებს აქაურ ხალხს, თითოეულ ჩვენს მოქალაქეს. ყველას კარგად გვესმის, რომ წყალმომარაგება, წყალარინება არის უაღრესად დიდი პრობლემა და ყველამ ერთად ამას უნდა მივხედოთ. მოგეხსენებათ, უახლოესი ორი-სამი წლის განმავლობაში ეს პრობლემა მოგვარდება".

ამჯერად თორნიკე რიჟვაძემაც წარსულსა და "გამორჩეულ 8 წელზე" გაამახვილა ყურადღება.

რიჟვაძე ქედაში: "ბოლო 8 წელი მართლაც გამორჩეული იყო, როგორც ქედისთვის, ისე, ჩვენი ქვეყნისთვის. ჩვენ უნდა გავაგრძელოთ ღირსეული, სამართლიანი სახელმწიფოს შენება, რომელსაც 2012 წელს საფუძველი დაუდო ჩვენი პარტიის ლიდერმა ბიძინა ივანიშვილმა".

მმართველი გუნდი უკვე რვა წელია საუბრობს წინა ხელისუფლების "ცხრაწლიან რეჟიმსა" და ნაციონალური მოძრაობის მმართველობის დროს არსებულ პრობლემებზე. ამ საკითხს ისინი იყენებენ არამხოლოდ ოპონენტების კრიტიკისთვის, არამედ კონტრარგუმენტად მაშინ, როცა მათ მმართველობას აკრიტიკებენ. საპასუხოდ ოპოზიცია მოუწოდებს მმართველ გუნდს, რომ სხვის 9-წლიან მმართველობაზე საუბრის ნაცვლად, საკუთარი 8-წლიანი მმართველობა შეაფასოს.