"მე ვარ მომხრე, რომ გამკაცრდეს სასჯელი ცილისწამებაზე, მაგრამ არის ძალიან ვიწყო ზღვარი, რომ არ შეილახოს მედიის თავისუფლება და გამოხატვის თავისუფლება", - ამის შესახებ პარლამენტის დეპუტატმა და პარტია პატრიოტთა ალიანსის ლიდერმა ირმა ინაშვილმა, დღეს 19 დეკემბერს, ჟურნალისტებთან საუბრისას განაცხადა.

პარლამენტში განსახილველად შესულ საკანონმდებლო წინადადებას არ იზიარებს საპარლამენტო უმრავლესობის ნაწილი, ჯანდაცვის კომიტეტის თავმჯდომარე აკაკი ზოიძე მიიჩნევს, რომ ასეთი ტიპის კანონის მიღება იწვევს მის ბოროტად გამოყენებას:

"ძალიან ფრთხილად უნდა მოვეკიდოთ, გასაგებია მოტივაცია, რატომაც შემოდის ეს კანონი მაგრამ, ეს არის ძირითადად არცთუ დემოკრატიულ ქვეყნებში. მე პირადად როგორც რიგითი პარლამენტარი, ასეთ ინიციატივას მხარს არ დავუჭერ".

უმრავლესობის კიდევ ერთი ლიდერი არჩილ თალაკვაძე აცხადებს რომ აღნიშნულ ინიციატივას პარლამენტი განიხილავს, თუმცა მისივე თქმით, იგი ცილისწამებაზე დამატებითი პასუხისმგებლობის შემოტანას არ ემხრობა.

იურიდიულ მეცნიერებათა აკადემიის პრეზიდენტმა და მოსამართლე ლალი ფაფიაშვილის მამამ შოთა ფაფიაშვილმა საკუთარი ორგანიზაციის სახელით, საკანონმდებლო წინადადებით მიმართა პარლამენტს, რომ ცილისწამება და შეურაცხყოფა კვლავ სისხლის სამართლის წესით დაისაჯოს.