დაავადებათა კონტროლის ეროვნული ცენტრის დირექტორის მოადგილემ, პაატა იმნაძემ განაცხადა, რომ მესტიის დატოვება მოქალაქეებს საკარანტინო რეჟიმის დაცვით შეეძლებათ. მან ამასთან დაკავშირებით, მთავრობის ადმინისტრაციაში მიმდინარე ბრიფინგზე ჟურნალისტს უპასუხა.

"წითელ ზონაზე ლაპარაკი ზედმეტია. 5 რაზმი მუშაობს, ერთი გზაშია, ხვალ ერთი ამდენი დაემატება და მასობრივი კვლევები ჩატარდება", — განაცხადა იმნაძემ.

მისივე თქმით, მესტიაში შესაბამისი ღონისძიებები ჩატარდება, თუმცა თუ წესებს ყველა არ დაიცავს, მსგავსი სიტუაცია მოსალოდნელი იქნება სხვაგანაც.

"სამწუხაროდ, მოხდა ის, რასაც ჩვენ დიდი ხანია ვამბობთ და მოვუწოდებთ მოსახლეობას, რომ ნუ დაგვავიწყდება, კორონა არის ჩვენ გვერდით. შედეგი გვაქვს სახეზე. გვაქვს შემთხვევები სოფელი ლენჯერში. კორონამ თვალნათლივ დაგვანახა, რომ ის არსად არ არის წასული და თუ ყველა წესს არ დავემორჩილებით, იძულებული გავხდებით ასეთი შემზღუდავი ღონისძიებები განვახორციელოთ", — განაცხადა იმნაძემ.

სუს-ის უფროსის მოადგილის, ალექსანდრე ხოჯევანიშვილის განცხადებით, დაბა მესტიაში, უშგულსა და ლენჯერში ფუნქციონირების უფლება ექნებათ მხოლოდ აფთიაქებს, საბანკო დაწესებულებებს, სასურსათო მაღაზიებსა და ღია ტიპის საკვებ დაწესებულებებს.

მთავრობის ადმინისტრაციაში გაკეთებული განცხადების მიხედვით, თავშეყრის ადგილებზე მკაცრად გაკონტროლდება დისტანციის დაცვა, დახურულ სივრცეებში პირბადეების გამოყენება და ხელის ჰიგიენა.

რაც შეეხება სასტუმროებს, ხოჯევანიშვილის თქმით, ტურიზმის ადმინისტრაცია და ეპიდემიოლოგები შეაფასებენ, აკმაყოფილებენ თუ არა ისინი სტანდარტს და რომელიც აკმაყოფილებს, ის გადაკეთდება საკარანტინო სივრცედ.

კორონავირუსის ახალი დადასტურებული შემთხვევების გამო, მესტიაში შესვლა და გამოსვლა იზღუდება.