საქართველოში ევროკავშირის წარმომადგენლობა, საქართველოში რუსეთის შეჭრის მე-12 წლისთავთან დაკავშირებით განცხადებას ავრცელებს და ქვეყნის სუვერენიტეტის მხარდაჭერაზე საუბრობს.

ევროკავშირი კვლავ გამოთქვამს საქართველოს დამოუკიდებლობის, სუვერენიტეტისა და ტერიტორიული მთლიანობის მტკიცე მხარდაჭერას, ქვეყნის საერთაშორისოდ აღიარებულ საზღვრებში.

განცხადებაში ვკითხულობთ, რომ კონფლიქტით დაზარალებული მოსახლეობის ფუნდამენტური უფლებები კვლავ ირღვევა.

"მათ შორის, გადაადგილების თავისუფლების შეზღუდვის გზით, ე.წ. ბორდერიზაციის, კონტროლირებადი გადაკვეთის პუნქტების დროებითი დახურვისა და უკანონო დაკავებების საშუალებით", — ნათქვამია განცხადებაში.

საქართველოში ევროკავშირის წარმომადგენლობა აღნიშნავს, რომ აფხაზეთსა და ოკუპირებულ ცხინვალის რეგიონში განთავსებული რუსეთის სამხედრო ძალები და იქ შექმნილი დაძაბულობა, არღვევს საერთაშორისო კანონმდებლობას და 2008 წლის 12 აგვისტოს შეთანხმებას.

ასევე, საუბარია, რომ ევროკავშირი მხარს უჭერს კონფლიქტების მშვიდობიანი გზებით მოგვარებას და გამოთქვამს მზადყოფნას, გააგრძელოს საქართველოში სტაბილიზაციის და კონფლიქტის მოგვარებაზე მიმართული ძალისხმევა.

"მათ შორის, ჟენევის საერთაშორისო დისკუსიებში თანათავმჯდომარის რანგში ჩართულობის, სამხრეთ კავკასიასა და საქართველოში კრიზისის საკითხებში ევროკავშირის სპეციალური წარმომადგენლის საქმიანობის, და ადგილზე მნიშვნელოვანი როლის მქონე ევროკავშირის სადამკვირვებლო მისიის მუშაობის საშუალებით", — აღნიშნულია განცხადებაში.

აგვისტოს ომის დაწყებიდან 12 წელი გავიდა. 2008 წლის აგვისტოში რუსეთი საქართველოს ტერიტორიაზე შემოიჭრა, ცეცხლი გაუხსნა ქართულ სოფლებს, დაიკავა როკის გვირაბი. საქართველომ რუსულ აგრესიას უპასუხა. ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.

ჯანდაცვის სამინისტროს მონაცემებით, დაჭრილ/დაშავებულ სამოქალაქო და სამხედრო პირთა რაოდენობა სულ 2 232 პირს შეადგენს. მათ შორის, 1045 სამხედრო მოსამსახურე იყო.

IDFI-ის ინფორმაციით, აგვისტოს ომის შემდეგ, საქართველოში 263 598-მდე გაიზარდა დევნილთა რაოდენობა. 2009-2015 წლებში კი, საცხოვრებელი ფართი საკუთრებაში გადაეცა ჯამში 18 679 ოჯახს.

2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების მიუხედავად, რუსეთი კვლავ აგრძელებს სუვერენული და დამოუკიდებელი სახელმწიფოს რეგიონების უკანონო ოკუპაციას, საერთაშორისო სამართლის უგულებელყოფით. საოკუპაციო ხაზთან კვლავ არსებობს საქართველოს მოქალაქეების გატაცებებისა და უკანონო დაკავებების ფაქტები. ასევე, საოკუპაციო ხაზის გასწვრივ განლაგებულია მავთულხლართები და ე.წ. საზღვრის აღმნიშვნელი ნიშნები