თბილისის ბიუჯეტის შესახებ, ოპონენტების შენიშვნებს ფინანსური დოკუმენტის საბოლოო პროექტთან დაკავშირებით დღეს, 11 დეკემბერს ქალაქის მერი ჟურნალისტებთან საუბრისას გამოეხმაურა. მისი განცხადებით, ბიუჯეტის პროექტი იდეალურია და ოპოციზიის შენიშვნები პოპულისტური იყო:

"უმცირესობას მთელ რიგ შემთხვევებში ძალიან პოპულისტური მოთხოვნები ჰქონდა, ამიტომ, მათი ნაწილის გათვალისწინება არ მოხდა და ვერც მოხდებოდა. ის საქმიანი შენიშვნები და წინადადებები, როგორც უმცირესობიდან, ასევე უმრავლესობისგან ჩვენ მივიღეთ და შეძლებისდაგვარად გავითვალისწინეთ. ბიუჯეტის პროექტი არის დახვეწილი, სრულყოფილი და ძალიან მნიშვნელოვანი. ისინი არც არასდროს არ უჭერდნენ მხარს დედაქალაქის ბიუჯეტს და გამიკვირდება თუკი ახლა დაუჭერენ".

9 დეკემბერს, თბილისის 2017 წლის ბიუჯეტის დაზუსტებული პროექტი საკრებულოში შევიდა.

მერიის განცხადებით, ბიუჯეტის მოცულობა, პირვანდელ ვარიანტთან შედარებით, 1,031,500 ლარით გაიზარდა და 801,302,000 ლარი შეადგინა. პროექტის განხილვა საკრებულოში მომავალი კვირიდან დაიწყება.