რუსეთში, ხაბაროვსკის მხარის დაკავებული გუბერნატორის მხარდასაჭერი აქცია კვლავ მიმდინარეობს. აქციები უკვე 15 დღეა უწყვეტად იმართება. მოქალაქეები ქუჩაში არიან გასულები ქალაქ ხაბაროვსკში, ვლადივოსტოკსში, სამხრეთ სახალინსა და სხვა ქალაქებში.

დემონსტრანტები სკანდირებენ "მე/ჩვენ ფურგალი" და "20 წელია ნდობა არ არსებობს". როგორც BBC-ის რუსული გამოცემის კორესპონდენტი ადგილიდან იუწყებოდა, 25 ივლისის აქციაზე იმაზე მეტი ადამიანი გავიდა, ვიდრე წინა შაბათს.

ხაბაროვსკის პორტალის DVhab-ის ინფორმაციით, აქციაში 15-20 ათასი ადამიანი იღებს მონაწილეობას. ქალაქის მერიაში კი ამბობენ, რომ ქუჩაში 6,5 ათასი დემონსტრანტია.

რამდენიმე დღის წინ ხაბაროვსკის მხარის გუბერნატორობის მოვალეობის შემსრულებელი მიხაილ დეგტიარევი ამბობდა, რომ მომიტინგეებთან არ გავიდოდა. ასევე, მან განაცხადა, რომ ბოლო დღეების აქციები უცხოეთიდანაა მართული.

მიმდინარე წლის 9 ივლისს ხაბაროვსკში მხარის გუბერნატორი სერგეი ფურგალი დააკავეს, რომელიც რეგიონს 2018 წლიდან ხელმძღვანელობს. მას 2004-2005 წლებში ბიზნესმენების მკვლელობის ორგანიზებასა და მკვლელობაში ედება ბრალი.

ფურგალის მიმართ წაყენებულ ბრალს მხარის მაცხოვრებლები არ იზიარებენ და 11 ივლისიდან უკვე სისტემატიურად აქციებს აწყობენ.

20 ივლისს პრეზიდენტმა ვლადიმერ პუტინმა ხელი მოაწერა ბრძანებას, რომლითაც ფურგალს გუბერნატორობა შეუწყვიტეს.