ბესო ჩუბუნიძე, რომელიც სექსისტური და ჰომოფობიური განცხადებებით გამოირჩევა, მაჟორიტარ დეპუტატობას გეგმავს. ის რუსთავში კენჭს პარტია ქართული ფესვების სახელით იყრის.

"მე საერთოდ არ ვიცი, რას ნიშნავს ჰომოფობია და სექსისტობა და ვინ ამბობს, ბესო ჩუბინიძე ჰომოფობია ან სექსისტი. [...] საერთოდ არ ვიცი, რას ნიშნავს ჰომოფობია. ჰომოფობია ვიცი კაცთმოძულეობა, რაც მე მსმენია პირდაპირი", — განაცხადა ჩუბინიძემ On.ge-სთან.

მაჟორიტარობის კანდიდატი ჰომოფობიური და სექსისტური განცხადებების გამო კრიტიკას სიძულვილის ენად აღიქვამს:

"ადამიანთა კატეგორია, 10-15 ადამიანი, რომელსაც სძულს ბესო ჩუბინიძე და ვერ მიტანს და სიძულვილის ენით საუბრობს ჩემ მიმართ, ალბათ, იმიტომ ვეზიზღები და ვერ მიტანენ, რომ ქართული ტრადიციების, ქართული სულისა და ქართული გულის გამტარებელი ვარ".

სხვადასხვა ეთერში მას როგორც ჰომოფობიური, ისე სექსისტური განცხადებები გაუკეთებია. მაგალითად, ტელეკომპანია იბერიას ეთერში გეი ქორწინებაზე საუბრისას თქვა, რომ ამას "საბუთი არ სჭირდება" და "სახლში რაც გინდათ აკეთეთ". ამასთან, ბესო ჩუბინიძეს წარმოუდგენია, რომ ოჯახში "კაცი უნდა კაცობდეს".

როგორც ჩუბინიძე ამბობს, მას პარლამენტში მოხვედრის იმედი აქვს. მისივე თქმით, საკანონმდებლო ორგანოში ბევრი მიმართულებითაა დაინტერესებული, თუმცა ძირითადად ემიგრანტების საკითხებზე იმუშავებს.

ბესო ჩუბინიძის მიერ მედიისთვის დაგზავნილი პრესრელიზის თანახმად, პარტია ქართული ფესვები 2020 წლის აპრილში აშშ-ში ქართველი ემიგრანტების ინიციატივით დაარსდა. ტელეკომპანია ფორმულას ინფორმაციით, ჩუბინიძის გარდა ახალ პარტიაში მომღერალი ნუგზარ კვაშალი გაერთიანდა, რომელიც გურიაში მაჟორიტარად იყრის კენჭს.