უკრაინა საოკუპაციო ხაზთან საქართველოს მოქალაქის, ზაზა გახელაძის დაჭრასა დაა გატაცებას გმობს. ამის შესახებ ქვეყნის სააგარეო საქმეთა სამინისტრომ სპეციალური განცხადება გაავრცელა.

"უკრაინა განმეორებით ადასტურებს საქართველოს სუვერენიტეტსა და ტერიტორიულ მთლიანობას საერთაშორისო დონეზე აღიარებულ საზღვრებში და მოითხოვს, რომ რუსეთის ფედერაციამ დაუყოვნებლივ შეაჩეროს დესტაბილიზაციის გამომწვევი მოქმედებები საქართველოს სამოქალაქო მოსახლეობის წინააღმდეგ, უზრუნველყოს საქართველოს ოკუპირებულ ტერიტორიებზე ადამიანის უფლებათა საერთაშორისო და სადამკვირვებლო ორგანიზაციებისათვის შეუზღუდავი წვდომა, აგრეთვე უზრუნველყოს დაკავებული და დაჭრილი საქართველოს მოქალაქის დაბრუნება", — აღნიშნულია განცხადებაში.

ამასთან, უკრაინა მიუთითებს, რომ რუსეთის საოკუპაციო რეჟიმის ასეთი პროვოკაციული ქცევა 2008 წლის 12 აგვისტოს, ცეცხლის შეწყვეტის შეთანხმებას აშკარად არღვევს და მიზნად ისახავს რეგიონში უსაფრთხოების სიტუაციის დესტაბილიზაციას.

"დაკავებით, მოტაცებით, წამებითა და მკვლელობებით, რუსეთი სისტემატურად და უპრეცედენტოდ აგრძელებს საერთაშორისო ჰუმანიტარული სამართლის ნორმების დარღვევას", — აღნიშნავენ უკრაინის საგარეო საქმეთა სამინისტროში.

ოკუპანტებმა ზაზა გახელაძე კასპში 11 ივლისს გაიტაცეს, მანამდე კი ცეცხლსასროლი იარაღით დაჭრეს. შერიგებისა და სამოქალაქო თანასწორობის საკითხებში სახელმწიფო მინისტრის მოვალეობის შემსრულებელის, ლია გიგაურის ინფორმაციით, ის ახალგორის საავადმყოფოშია და მის სიცოცხლეს საფრთხე არ ემუქრება.